एनसेलको नयाँ मोबाइल नम्बरमा समस्या, अन्य नम्बर जस्तै सहजीकरण गर्न सम्बन्धित निकायलाई आग्रह

एनसेलको नयाँ मोबाइल नम्बरमा ओटीपी नआउने, साइन अप गर्न समस्या, वालेटबाट कारोबार गर्दा कठिनाइ देखिएको छ ।

एनसेलले एक सूचना जारी गर्दै ९७० बाट सुरू हुने नयाँ मोबाइल नम्बरमा समस्या देखिएको र अन्य नम्बर जस्तै सहजीकरण गर्न अनुरोध गरेको हो ।

एनसेल आजियाटा लिमिटेडले नेपाल दूरसञ्चार प्राधिकरणको स्वीकृतिबमोजिम ग्राहक सुविधाका लागि ९७०XXXXXXX देखि सुरु हुने नयाँ मोबाइल नम्बर वितरण गर्दै आएको छ ।

‘नयाँ मोबाइल नम्बर लिएका ग्राहकहरुबाट ओटीपी (OTP) नआएको, मोबाइल एप र वेबमा आधारित सेवाहरु लिनका लागि साइन अप (Sign Up ) गर्दा समस्या भएको, वालेटबाट कारोबार गर्दा कठिनाइ भएको लगायतका जानकारी प्राप्त गरिरहेका छौं,’ एनसेलको सूचनामा भनिएको छ ।

त्यसकारण ९७० देखि सुरु हुने नयाँ मोबाइल नम्बरलाई पनि अन्य नम्बरसरह आफ्नो सिस्टममा चल्ने बनाउँदै सेवाहरु खोल्न, मोबाइल नम्बर प्रयोगमार्फत सेवाप्रदान गर्ने सरकारी तथा अर्धसरकारी निकाय, बैंक तथा वित्तीय संस्था र निजी संघसंस्था लगायत सबैलाई एनसेलले आग्रह गरेको छ ।