आईसीटी समाचार
सञ्चार तथा सूचना प्रविधि मन्त्रालयका सविव डा. वैकुण्ठ अर्यालले आइसिटीको लिडर निजी क्षेत्र भएको बताएका छन् । शुक्रबार बिटुबी आइसिटी बिजनेश समिट २०२१ मा आफ्नो मन्तव्य राख्दै सचिव अर्यालले यस्तो बताएका हुन् ।
‘आइसिटीको लिडर निजी क्षेत्र हो । आइसिटीको क्षेत्रमा सरकार लिडर हुँदैन्,’ सचिव अर्यालले भने, ‘हामीले बाटो मात्रै बनाइदिने हो । त्यो बाटोमा गाडी कुदाउनेदेखि लिएर सबै काम गर्ने निजी क्षेत्रले हो ।’
निजी क्षेत्रका समस्यालाई सहजीकरण गर्न आफुहरू तयार भएको उनले बताए । आइसिटीले देशको अर्थतन्त्रलाई टेवा पुर्याउने उनको भनाइ छ ।
सरकार एक्सेस बढाउनका लागि काम गर्ने उनले बताए । उनले भने, ‘त्यसका लागि आधारभूत पूर्वाधार सरकारले बनाइदिन्छ ।’ त्यस्तै एफोर्डबिलिटी र रिलायबिलिटीमा समेत काम गर्न खोजेको उनले बताए ।
डिजिटल नेपालका लागि डिजिटल साक्षरता बढाउनु पर्ने अर्यालको भनाइ छ । ‘साक्षरताको पोटोमा हामीले थोरै सहयोग गर्छौं । यहाँहरू अगाडि लागिदिनु पर्छ’ उनी भन्छन् ।
