आईसीटी समाचार
सरकारले सार्वजनिक सवारीसाधनमा जीपीएस डिभाइस जडान गर्ने भएको छ । यातायात व्यवस्था विभागले शुक्रबार एक सूचना प्रकाशित गर्दै पहिलो चरणमा १०० वटा यात्रु वाहक सार्वजनिक सवारीसाधनमा जीपीएस डिभाइस जडान गर्ने भएको हो ।
विभागले सार्वजनिक सवारीसाधनहरूको गति तथा रूट लगायतका विषयमा अनुगमन गर्ने उद्देश्यले जीपीएस सिस्टम विकास गरिसकेको छ । अब भने त्यसलाई कार्यान्यनको चरणमा लैजादै छ ।
पहिलो चरणमा पाइलट रूट्स काठमाडौं-जनकपुर, काठमाडौं विरगंज र काठमाडौं-पोखरामा चल्ने १०० वटा सार्वजनिक यात्रु वाहक सवारी साधनमा निःशुल्क जीपीएस डिभाइस जडान गरी सञ्चालनमा ल्याइ अध्ययन गर्न लागिएको विभागले जनाएको छ ।
उक्त रूटहरूमा सवारी सञ्चालन गरिरहेका इच्छुक यातायात व्यवसायी तथा सवारीधनीहरूलाई सवारी साधन दर्ता गराई सवारीमा निःशुल्क जीपीएस डिभाइस जडान गराउन विभागले आह्वान गरेको छ ।
विभागले फर्स्ट कम फर्स्ट प्रायोरिटी (पहिला आउनेलाई प्राथमिकता) का आधारमा र पेश गरेको कागजातका निःशुल्क जीपीएस सिस्टम जडान गर्नेछ ।
निःशुल्क जीपीएस जडानका लागि यातायात व्यवसाय प्रमाणपत्र, सवारी दर्ता प्रमाणपत्र, सवारी चालकको परिचयपत्र (नेपाली नागरिकताको प्रमाणपत्र) र सवारी चालक अनुमति पत्र पेश गर्नुपर्नेछ । कागजातसहित विभागको कार्यालय मिनभवन काठमाडौं, इमेल वा फोन नम्बरमा सम्पर्क गर्न सकिने जनाइएको छ ।
