आईसीटी समाचार
नेट टिभीले एन्ड्रोइड टिभीमा आधारित ‘नेट टिभी स्ट्रिम्ज प्लस’ सेटअप बक्स सार्वजनिक गरेको छ । २ वर्षको तयारीपछि कम्पनीले नेट टिभी स्ट्रिम्ज प्लस सार्वजनिक गरेको हो ।
यो सेटअप बक्स एन्ड्रोइड टिभीबाट सञ्चालित छ । नेट टिभी नेपालको पहिलो गूगलबाट प्रमाणित एन्ड्रोड टिभी सञ्चालक हो । यसमा गूगल प्ले, क्रोमकास्ट, युट्युब र भ्वाइस कन्ट्रोलको सुविधा रहेको छ ।
नेट टिभी स्ट्रिम्ज प्लसको सहयोगले एउटा सामान्य टिभीलाई पनि फिचरयुक्त स्मार्ट टिभी बनाउन सकिने छ । यसमा २०० बढी लाईभ टिभी च्यानलहरू उपलब्ध हुनेछन् । यसलाई कन्ट्रोल गर्न आफ्नो स्मार्टफोन रिमोटको रूपमा प्रयोग गर्न सकिन्छ ।
नेट टिभीको यस सेटअप बक्सबाट गेम खेल्न सकिने छ , जसका लागि कम्पनीले एयर कन्सोलसँग सहकार्य गरेको छ । अहिले १८० बढी गेमहरू नेट टिभीको सेटअप बक्स प्रयोग गरी टिभीमा खेल्न सकिन्छ ।
नेट टिभी स्ट्रिम्ज प्लसले डुअल ब्याण्ड वाईफाई, युएसबी टाइप ए पोर्ट, युएसबी ड्राइभ लगायतका फिचर दिएको छ । यसमा नेट फ्लिक्स र अमेजन प्राइम जस्ता ओटीटी प्लेटफर्म भने उपलब्ध छैनन् ।
सरकारको नीतिका कारण नेट फ्लिक्स र अमेजन प्राइम जस्ता ओटीटी प्लेटफर्म उपलब्ध गराउन नसकिएको कम्पनीको भनाइ छ । तर पनि भविष्यमा यी सुविधा उपलब्ध हुने कम्पनीले जनाएको छ ।
वर्ल्डलिंकको नजिकको शाखामा गएर नेट टिभी स्ट्रिम्ज प्लसको सेटअप बक्स खरिद गर्न सकिने छ । सेटअप बक्सको शुल्कका वर्ल्डलिंक वा नेट टिभीमा सम्पर्क गर्न सकिने छ । यसको मासिक प्याकेजको शुल्क ३५० रूपैयाँ तोकिएको छ ।
