अनलाइन नेटवर्किङ व्यवसायमा नलाग्नुस्, कोही लागेको भए सूचना दिनुस्ः अर्थमन्त्री शर्मा

अर्थमन्त्री जनार्दन शर्माले अनलाइन नेटवर्किङ व्यवसायमा नलाग्न आग्रह गरेका छन् । बिहिबार माओवादी केन्द्र कर्णाली प्रदेशको भर्चुअल विस्तारित बैठकलाई सम्बोधन गर्दै मन्त्री शर्माले डिजिटल नेटवर्किङ व्यवसायमा नजोडिन र जोडिएको भए तत्काल छोड्न सबैलाई आग्रह गरेका हुन् ।

डिजिटल नेटवर्किङको माध्यमबाट देशको पुँजी विदेश पलायन भइरहेकाले यस्तो गैरकानुनी गतिविधि नियन्त्रण गर्न सरकारलाई सहयोग गर्न पनि उनले आग्रह गरे ।  कतै कोही व्यक्ति यस व्यवसायमा संलग्न रहेको भए त्यसको सूचना सरकारलाई दिन समेत उनले अनुरोध गरे ।

पछिल्लो समय क्रिप्टोकरेन्सी र परामीड शैलीको डिजिटल नेटवर्किङबाट अवैध रूपमा नेपाली पैसा बाहिरिन थालेपछि यसलाई नियन्त्रण गर्न सरकारले समिति बनाउने तयारी गरेको छ ।

उक्त समितिमा अर्थमन्त्रालय, नेपाल राष्ट्र बैंक, नेपाल दूरसञ्चार, राजस्व अनुसन्धान विभाग र प्रहरीको केन्द्रीय अनुसन्धान ब्यूरो (सीआईबी) का प्रतिनिधि सदस्य रहने छन् ।