आईसीटी समाचार
फ्युजमेसिनको एआई फेलोशिपमा भोलि मंगलबारसम्म आवेदन दिन सकिने छ । एआईको क्षेत्रमा काम गर्दै आएको फ्युजमेसिनले केही दिन अगाडि नेपालमा ‘एआई फेलोशिप २०२२’ घोषणा गरेको थियो ।
फ्युजमेसिनले एआई शिक्षा र एआई रोजगार दिने लक्ष्य राखेको छ । उक्त कार्यक्रम अन्तर्गत फ्युजमेसिनले नेपालमा एआई फेलोशिप २०२२ को घोषणा पनि गरेको छ ।
अनलाइनबाट हुने फेलोशिप कार्यक्रम विगत २ वर्ष देखि फ्युजमेसिनको पहलमा नेपालमा विकास र विस्तार गरिएको हो । विगत २ वर्ष देखि नै यस कार्यक्रममा यूकेएड स्कील्स फर इम्प्लोइमेन्ट (सीप) को सहयोग रहदै आएको छ ।
यस कार्यक्रमको मुख्य अभिप्राय क्षमता अभिवृद्धि हो । यस कार्यक्रमको मुख्य उद्देश्य नेपालमा एआई इन्जीनियरहरूको संख्यामा वृद्धि गर्नु हो र यस कार्यक्रममा जम्मा १०० जना गणित, ईन्जिनियरिङ र कम्प्युटर विज्ञान पृष्ठभूमि भएका विश्वविद्यालय अध्यनरत विद्यार्थीहरू तथा स्नातक उतीणर्हरूलाई परीक्षा मार्फत आवद्ध गरिनेछ ।
छनोट भएकालाई सम्पूर्ण पाठ्यक्रमहरूमा पूर्ण छात्रवृत्ति प्रदान गरिनेछ । अमेरिकाका टप विश्वविद्यालयमा रहेका एआई संकायका सदस्यहरू र एआई उद्योग विशेषज्ञहरुद्वारा निर्माण गरिएको फ्युजमेसिनको स्वामित्वमा रहेको माइक्रोडिग्री र माइक्रोडिग्री स्पेशलाइजेशन कार्यक्रमलाई एआई फेलोशिप २०२२ मा समावेश गरिने कम्पनीले जनाएको छ ।
एक वर्ष लामो कार्यक्रममा मेसिन लर्निङ, डिप लर्निङ्ग, न्याचुरल ल्यांग्वेज प्रोसेसिङ्ग र कम्प्युटर भिजनको लगायतको बारेमा सिकाईने छ । हरेक बर्ष सबैका लागि विश्वसनीय र उच्च गुणस्तरको एआई तालिम प्रदान गरि एआईमा पहुँच बढाउने बाटोमा अगाडि बढेको फ्युजमेसिनका प्रमुख कार्यकारी अधिकृत समीर मास्केले बताए ।
उनले फेलोशिप कार्यक्रमका पुर्व विद्यार्थीहरूलाई रोजगारी प्रदान गरेको र यस किसिमको महत्वपूर्ण पहलको निरन्तरता मार्फत अझ उच्च गुणस्तरको प्रतिभा निर्माण गर्न सक्षम हुने आशा व्यक्त गरे ।
कार्यक्रमको अन्त्यसम्ममा विद्यार्थीहरूले आर्टिफिसियल इन्टेलिजेन्स, मेसिन लर्निङ र डीप लर्निङ एल्गोरिदमका साथै अन्तर्निहित गणित र कोडको ठोस बुझाइको विकास गर्नेछन् ।
कार्यक्रमले सम्मानित शिक्षाविद् र उद्योग विशेषज्ञहरूद्वारा संचालित साप्ताहिक अनलाइन कक्षाहरू, प्रोग्रामिङ असाइनमेन्टहरू, समूह परियोजनाहरू र परीक्षाहरू समावेश गरी मिश्रित सिकाइ प्रणालीको प्रयोग गर्नेछ । साथै धेरै जसो सामग्रीहरू विद्यार्थीहरूले आफ्नो अनुकुल प्रयोग गर्नका लागि अनलाइन उपलब्ध हुनेछन् ।
फ्युजमेसिनले सन् २०१७ मा पहिलो पटक एआई फेलोशिप कार्यक्रमको सुरुवात गरेको थियो । आर्टिफिसियल इन्टेलीजेन्स (ए.आई.) लगायत आफ्ना अन्य सेवाहरुको माध्यमबाट उद्यम ब्यबसाय क्षेत्रमा उपलब्धी भित्र्याउनमा नाम कमाएको संस्था फ्यूजमेशिनको स्थापना सन २०१३ मा भएको हो ।
कसरी सञ्चालन हुन्छ एआई फेलोशिप २०२२ ?
एआई फेलोशिप २०२२ मा हरेक तीन-तीन महिनाका लागि चार ओटा कोर्स रहेका छन् । क्लासहरु अनलाइन लाइभ लेक्चर मार्फत सञ्चालन गरिनेछ ।
कोर्सको समाप्ति पछि विद्यार्थीहरुले सर्टिफिकेट पनि प्राप्त गर्न सक्नेछन् । पहिलो कोर्समा मेसिन लर्निङ (एमएल) रहेको छ । मेसिन लर्निङ प्रणाली विशेषगरी गणितमा आधारित हुने र सांख्यिकीय हुने गर्दछ ।
यसमा मेसिनलेनै निणर्य लिनका लागि डेटामा प्याटर्न खोज्ने गर्दछ । सांख्यिकीय मोडेल बनाउनका लागि विभिन्न एल्गोरिदम हुने गर्दछ । एमएललाई एआईको सबसेटको रुपमा लिन सकिन्छ ।
यो कोर्समा एमएलको प्रक्रिया, वर्कफलो र प्रविधी सिकाइनेछ । अर्को तीन महिनाकै कोर्स रहेको विषय हो डिप लर्निङ्ग । यस कोर्सम डिप लर्निङ्गको आर्किटेक्चर, प्रयोग, वर्कफलो र प्रविधी सिकाइनेछ ।
त्यस्तै कोर्समा मोडेल बनाउन, प्रशिक्षण गर्न र प्रयोग गर्न सिकिनेछ । तेस्रो कोर्समा कम्प्यूटर भिजन रहेको छ । यो कोर्समा कम्प्यूटर भिजनको थुप्रै कन्सेप्टहरु पढाइन्छ जसमा ईमेज प्रोसेसिङ, फिचर डिटेक्सन, ईमेज क्लासिफिकेसन र अब्जेक्ट रिक्ग्नीसन पर्ने गर्दछन् ।
अन्तिम कोर्स तीन महिनानै लाग्ने न्याचुरल लैंग्वेज प्रोसेसिङ्ग रहेको छ । यस कोर्समा टेक्सट नोर्मलाइजेसन, क्लासिफिकेसन, क्लसटरीङ, लैंग्वेज मोडलीङ, पार्सिङ, इन्फोरमेसन एक्सट्रयाक्सन र मेसिन ट्रान्सलेसन रहेको छ ।
एआई फेलोशिप २०२२ कसरी सहभागी हुने ?
यस एआई फेलोशिप २०२२ मा तेस्रो र चौथो वर्षका इन्जिनियरिङका विद्यार्थी र स्नातक तह उर्तीण गरिसकेको विद्यार्थीहरुले सहभागीता जनाउन सक्नेछन् ।
एआई फेलोशिप २०२२ मा सहभागी हुन चाहने विद्यार्थीहरुलाई लिनियर अल्जेब्रा, प्रोबाबिलिटी, स्टाटिसटिक्स र बेसिक क्यालकुलसको ज्ञान हुनुपर्नेछ ।
त्यस्तै सहभागीहरुलाई प्रोग्रामिङ र कम्प्यूटर साइन्सको पनि राम्रो जानकारी हुनुपर्छ र पाइथनमार्फत प्रोग्रामिङ गर्न आउनुपर्ने हुन्छ ।
एआई फेलोशिपमा सहभागी हुन शुरूमा यहाँ क्लिक गर्नुहोस् । त्यसपछि अनलाइन फाराम भनेर आफ्नो आवेदन बुझाउनुहोस् । तपाईको एप्लिकेशन स्वीकृत भएपछि तपाईले प्रोगाममा सहभागी हुनका लागि अनलाइन प्रवेश परीक्षामा सहभागी हुनुपर्ने हुन्छ ।
त्यस अनलाइन प्रवेश परीक्षामा पास भएर सर्टलिस्ट गरिएका सहभागीहरुलाई इन्टरभ्यू सेसनमा सहभागी गराइन्छ । इन्टरभ्यू सेसन सफलतापूर्वक पूरा भएपछि तपाई प्रोग्राममा सहभागी हुनसक्नुहुनेछ ।
एआई फेलोशिपको शैक्षिक टोलीमा को को छन् ?
एआई फेलोशिपको शैक्षिक टोलीमा फ्युजमेसिनका शैक्षिक मामिला निर्देशक प्रो. डा. बुलेन्ट उयानिकर रहेका छन् । उनी ब्रिटिश कोलम्बिया विश्वविद्यालयका पूर्व संकाय पनि हुन् ।
त्यस्तै फ्युजमेसिनका एआई एकेडेमिक्सका प्रबन्धक रोजेश मान शिखरकार यस टोलिका अर्को सदस्य हुन् । यसैगरि फ्युजमेसिनका एआई विकास प्रबन्धक राकेश कुमार कटुवाल तेस्रो सदस्यको रुपमा विद्यमान रहेका छन् ।
रोजगारीको अवसर
यी कोर्सहरु सम्पन्न गरेपछि विद्यार्थीहरुलाई जागिर नियुक्तिको अवसर पनि प्रदान गर्ने गरिन्छ । विभिन्न कम्पनीहरुमा विद्यार्थीहरुलाई सिफारिस गरेर पठाइनेछ । कम्पनीले राम्रो गर्ने विद्यार्थीहरुलाई फ्युजमेसिनमै रोजगार पनि दिने गर्दछ ।
