आईसीटी समाचार
नेपाल दूरसञ्चार प्राधिकरणले वैशाखदेखि पूर्ण रूपमा मोबाइल डिभाइस म्यानेजमेन्ट सिस्टम (एमडीएमएस) सञ्चालनमा ल्याउने भएको छ ।
शुक्रबार आयोजना भएको प्राधिकरणको २४ औं वार्षिकोत्सवको अवसरमा प्राधिकरणका अध्यक्ष पुरूषोत्तम खनालले वैशाख मसान्तसम्म एमडीएमएस सञ्चालनमा आउने जानकारी दिएका हुन् ।
नेपाल दूरसञ्चार प्राधिकरणले गत साउन १ गतेदेखि प्रारम्भिक रूपमा मोबाइल डिभाइस म्यानेजमेन्ट सिम्टम (एमडीएमएस) सञ्चालनमा ल्याएको थियो । तर पूर्वाधारको अभावमा अझैसम्म उक्त सिस्टम पूर्ण रूपमा लागु हुन सकेको छैन् ।
यो सिस्टम पूर्ण कार्यान्वयनमा आएपछि अवैध मोबाइल चल्ने छैनन्, जसले गर्दा सरकारलाई पनि राजस्वमा टेवा पुग्ने छ । नेपालमा आयात हुने मोबाइलमध्ये ३०-४० प्रतिशत अवैध बाटोबाट आउने गरेका छन् ।
यो सिस्टम पूर्ण रूपमा लागु भएपछि आईएमईआई नम्बर दर्ता नभएका मोबाइल नम्बर चल्ने छैनन् । उक्त मोबाइलमा सीमकार्ड प्रयोग गर्न सकिने छैन् । यदी तपाईको मोबाइलको आईएमईआई नम्बर दर्ता भएको छैन् भने आजै दर्ता गर्नुहोस् ।
मोबाइलको आईएमईआई नम्बर दर्ता भएको वा नभएको कसरी थाहा पाउने ?
आफ्नो मोबाइलको आईएमईआई नम्बर दर्ता भएको छ वा छैन् भनेर थाहा पाउन यहाँ क्लिक गर्नुहोस् । त्यसपछि यदी तपाईलाई आईएमईआई नम्बर थाहा छ भने मोबाइलको आईएमईआई नम्बर राखेर सबमिटमा क्लिक गरेर दर्ता भएको वा नभएको थाहा पाउन सकिने छ ।
यदी तपाईलाई आईएमईआई नम्बर थाहा छैन् भने *#०६# डायल गरेर आफ्नो मोबाइलको आईएमईआई नम्बर थाहा पाउन सकिने छ । यदी तपाईको मोबाइलले २ वटा सिम सपोर्ट गर्छ भने २ वटा आईएमईआई नम्बर देखाउँछ र एउटा सपोर्ट गर्छ भने एउटा देखाउँछ ।
अनलाइनबाटै यसरी गर्नुस् आईएमईआई नम्बर दर्ता
शुरूमा आफ्नो मोबाइलको आईएमईआई नम्बर दर्ता गर्न यहाँ क्लिक गर्नुहोस् । त्यसपछि त्यहाँ आवेदकको प्रकारमा नेपाली छनोट गर्नुहोस् भने टाइपमा आईएमईआई छनोट गर्नुहोस् ।
यति गरेपछि आफ्नो मोबाइलको ब्राण्ड नाम, मोडेल नाम, आईएमईआई नम्बर, आवेदकको नाम, ठेगाना, सम्पर्क नम्बर, नागरिकता वा पासपोर्ट वा अन्य परिचयपत्र र इमेल लगायतका विवरण राखेर सबमिट गर्नुहोस् ।
यदी तपाईको मोबाइलको २ वटा आईएमईआई नम्बर छन् भने २ वटै दर्ता गर्नुपर्ने हुन्छ । आईएमई नम्बर राख्ने ठाउँमा सेमिक्लोन (;) अप्सन राखेर अर्को आईएमईआई नम्बर राख्नु पर्नेछ ।
तपाईले सबमिट गरेपछि तपाईको इमेलमा एप्लिकेसन सबमिट भएको जानकारी प्राप्त हुनेछ र भेरिफेसन प्रोसेस पुरा भएपछि इमेलमा पुनः जानकारी आउने छ ।
