आईसीटी समाचार
बागलुङ । मोबाईल सेवा नहुँदा सामान्य कामको लागि पनि घण्टौं हिडेर सम्वन्धित ठाउँमा धाउनु पर्थ्यो । सञ्चार नहुँदा त्यहाँका स्थानियले निकै कठिनाई झेल्दै आईरहेका थिए तर अहिले नेपाल टेलिकमले आफनो सेवा विस्तार गरेपछि यो समस्या हटेर गएको छ ।
कुश्मा नगरपालिका वडा नं १४ आठथर डाँडाखर्कमा नेपाल टेलिकमले २५ मिटर अग्लो स्थायी संरचना निर्माण गरि टुजी र थ्रीजी सेवा सञ्चालनमा ल्याए सँगै सेवाग्राही लाभान्वित भएका छन ।
टावर सञ्चालनमा आएपछि मोदी गाउँपालिका वडा नं ७ को रापु राम्जा वडा नं ८ चित्रे, आधिखोला गाउँपालिकाको अधिकांश भुभाग सँगै सिल्मी, पकुवा, आर्थर सँगै पर्वत र स्याङजाको संगम स्थलका बस्तीहरुमा कभरेज भएसँगै स्थानिय खुसी भएका छन ।
टेलिकमले डिजिटल नेपाल निर्माण गर्ने लक्ष्य अनुरुप आफनो सेवा विस्तार र स्तरोन्नती कार्यलाई तीव्र रुपमा अगाडी बढाईरहेको सन्दर्भमा उक्त स्थानमा सेवा सुचारु गरिएको नेपाल टेलिकम बागलुङका प्रमुख तथा वरिष्ठ ईन्जिनियर केशव शर्माले जानकारी दिए ।
स्थानियलाई मध्यनजर गर्दै टेलिकमले अहिले टुजी मार्फत भ्वाईस र थ्रिजी मार्फत भ्वाईस अनि डाटा एकसाथ सञ्चालनमा ल्याएको उनले बताए ।
मोबाईल सेवा सुचारु भए सँगै मोवाईल प्रयोगकर्तालाई सहजता भएको छ शर्माले भने, 'त्यहाँ रहेको टावरबाट प्राविधिक हिसाबले सेवा प्रवाहमा जटिलता भएको र धेरै भुभागमा सिग्नल कभरेजमा समस्या थियो त्यसकारण हामीले प्राविधिक रुपमा अध्ययन गरेर सबै बस्ती र भुभाग समेटने गरि यो टावर निर्माण गरेका हौं अहिले समस्या हल भएको छ ।'
मोबाईल प्रयोगकर्ताको समस्यालाई मध्यनजर गरि त्यहाँका स्थानिय र जनप्रतिनिधी सँगको समन्वयमा स्थायी संरचना निर्माण गरि मोवाईल सेवा सुचारु गरिएको शर्माको भनाइ छ ।
टेलिकमले उक्त टावरमा छिट्टै अत्याधुनिक प्रविधीको चौंथो पुस्ताको फोरजी मोवाईल सेवा उपलब्ध गराउन आवश्यक गृहकार्य गरिरहेको जनाएको छ ।
सेवा नपुगेको ठाउँमा सेवा विस्तार गर्ने र सञ्चालन भएका ठाउँमा आवश्यकता अनुरुप सेवालाई समय सापेक्ष स्तरोन्नती गर्दै लैजाने टेलिकमले जनाएको छ ।
भौगोलिक विकटता, उपकरणहरु पुर्याउन निकै कठिन परिस्थितीको सामना गर्दै टेलिकम सँगको सहकार्यमा मोवाईल सेवा सञ्चालन गरिएको कुश्मा नगरपालिका वडा नं १४ का वडा सदस्य ईन्द्र गुरुङले जानकारी दिए । पहिले डाँडाकाँडा तिर पुगेर फोन गर्नु पर्ने बाध्यता थियो अहिले यहाँ टावर निर्माण भएपछि घरमै बसेर मज्जाले कुराकानी गर्न र मोवाईल डाटा मार्फत ईन्टरनेट चलाउन सहज भएको उनले बताए ।
त्यस्तै टेलिकमले मोदी गाउँपालिका वडा नं ३ लाङदी देउरालीमा पनि टावर निर्माण गरि सेवा सुचारु गरेको जनाएको छ । उक्त स्थानमा पहिलो पटक टुजी र फोरजी मोवाईल सेवा सुचारु गरिएको नेपाल टेलिकम पर्वतका कार्यालय प्रमुख नवराज रेग्मीले जानकारी दिए ।
सेवा सुचारु भएपछि भ्वाईससँगै उच्च गतिको अत्याधुनिक प्रविधीको फोरजी मार्फत ईन्टरनेट (मोवाईल डाटा) चलाउन सहज भएको कार्यालय प्रमुख रेग्मीको भनाई छ ।
मोवाईल सेवा सञ्चालनमा आएपछि मोदी गाउँपालिका वडा नं ३ को देउराली भुरुङगी, लाङदी, पुर्णगाउँ, डाँडाकमेरे, झिलीबराङ, वडा नं ४ को लेसपार, क्याङ, खुँईजरी र वडा नं ५ को बाजुङका झण्डै १२ सय घरधुरी प्रत्यक्ष लाभान्वित भएको मोदी गाउँपालिका वडा नं ३ का वडा अध्यक्ष देबेन्द्र बहादुर क्षेत्रीले जानकारी दिए ।
पहिले मोबाईलमा हल्का सिग्नल दिन्थ्यो नेटवर्क नहुँदा फोन सम्पर्क गर्न र ईन्टरनेट चलाउन साह्रै समस्या थियो टावर सञ्चालनमा आएपछि घरमै बसेर मोवाईल सेवा प्रयोग गर्न पाउँदा आफुहरु खुसी भएको स्थानिय विष्णु प्रसाद गुरुङले बताए ।
