आईसीटी समाचार
साइबर सुरक्षा सेवाप्रदायक कम्पनी सिनिकल टेक्नोलोजीको क्राउडसोर्सिङ बग हन्टिङ प्लेटफर्म बगभीले सिंगापुरमा मुख्यालय स्थापना गर्ने तयारी थालेको छ ।
माइक्रोसफ्टका दुई प्रोग्राम ‘हाईवे टु हन्ड्रेड युनिकर्न’ र ‘माईक्रोसफ्ट फाउण्डर हब’ मा चयन भएसँगै बगभीलाई अन्तर्राष्ट्र्रिय स्तरमा लिएर जान बाटो खुलेको बगभीका संस्थापक सीईओ नरेश लाम्गादेले बताए ।
माईक्रोसफ्टका यी दुई कार्यक्रम एशिया प्रशान्त क्षेत्रका स्टार्टअपहरुको उत्थानमा लक्षित छ । जसमार्फत त्यस्ता कम्पनीहरुले बजारमा प्रभावशाली उपस्थिति जनाउँदै डिजिटल नवप्रवर्तन भित्राउन सकुन् ।
उक्त विद्याको छनौट भएको बगभीलाई माईक्रोसफ्टले बजार रणनीति तथा पहुँच वृद्धि जस्ता विषयमा मेन्टरसिप प्रदान गर्ने सीईओ लाम्गादे बताउँछन् ।
‘माईक्रोसफ्टको दुबै विद्यामा हामी पर्न सफल भयौं,’ लाम्गादे भन्छन्, ‘यससँगै अब माईक्रोसफ्टले हामीलाई अन्तराष्ट्र्रिय पहुँच कसरी बढाउने र बजार कसरी अध्ययन गर्ने, भन्ने जस्ता कुराहरुको मेन्टरसिप दिएर सहयोग गर्नेछ ।’
साथै माईक्रोसफ्टले मेन्टरसिप बाहेक लगानीको क्षेत्रमा पनि सहयोग गर्ने लाम्गादेले बताए । ‘माईक्रोसफ्टको एम टुवेल्फ भन्ने आफ्नै छुट्टै भीसी छ, त्योसँग पनि माईक्रोसफ्टले हामीलाई जोडिदिने छ ।’ उनले भने ।
माईक्रोसफ्टले अनलाइनमार्फत दिने एक महिने लामो मेन्टरसिप पछि बगभीलाई अन्तराष्ट्र्रिय रुपमा लाने कम्पनीको तयारी छ । यसका लागि कम्पनीले मेमा सिंगापुर गएर बगभीको मुख्यालय स्थापना गर्ने लाम्गादेले सुनाए ।
‘अब माइक्रोसफ्टकै मेन्टरसिप पछि हामी बगभीलाई अन्तराष्ट्र्रिय रुपमा लिएर जाने छौं त्यसका लागि सुरुमा सिंगापुरमा मुख्यालय स्थापना गरी नेपालमा यसलाई सञ्चालन गर्नेछौं ।
कम्पनीले सिंगापुरमा पनि भौतिक संरचना सेटअप पगर्ने उनले बताए । माईक्रोसफ्टको कार्यक्रमको दौरान सिंगापूरका धेरै उद्यमीहरुसँग बगभीले सम्बन्ध विस्तार गर्न पाएको हुँदा आगामी दिनमा बगभीका लागि बलियो लगानी पनि आउनेमा लाम्गादे विश्वस्त छन् ।
पछिल्लो समय नेपालको पहिलो र एकमात्र क्राउडसोर्सिङ साइबर सुरक्षा प्लेटफर्म बगभीले राम्रो फण्ड नेटवर्क र प्लेटफर्महरु पाइरहेको उनले बताए ।
