आईसीटी समाचार
प्रविधिको तीब्र विकाससँगै शिक्षा, स्वास्थ्य लगायतका क्षेत्र डिजिटल हुँदै गइरहेका छन् । कोरोना महामारी पछि प्रविधिमैत्री सेवामा झन व्यापकता आएको छ ।
पछिल्लो समय बीमा क्षेत्र पनि प्रविधिमैत्री हुँदै गइरहेको छ । बीमाको प्रिमियम तिर्नेदेखि खरिद गर्नेसम्मका काम अनलाइनबाटै भइरहेका छन् । बीमा क्षेत्रलाई डिजिटल बनाउने अभियानमा ईबीमा डटकम पनि सक्रियरूपमा लागि परेको छ ।
बीमा क्षेत्रलाई डिजिटल बनाउने उद्देश्यले ईबीमा सन् २०१५ मा स्थापना भएको थियो । ईबीमा डटकम नेपालको पहिलो अनलाइन इन्स्योरेन्स पोर्टल हो ।
ईबीमा डटकमबाट इन्स्योरेन्स पोलिसी तुलना गरेर इन्स्योरेन्स पोलिसी खरिद गर्न सकिन्छ । ईबीमा आवद्ध भएर नेपालका सबै जीवन बीमा तथा निर्जीवन बीमा कम्पनीले आफ्नो पोलिसी बेच्न सक्छन् ।
हाल ईबीमामा मेट लाइफ, आईएमई लाइफ, एलआईसी नेपाल, नेपाल लाईफ, नेसनल लाइफ, ज्योति लाईफ, आईएमई जनरल, सिद्धार्थ इन्स्योरेन्स, लुम्बिनी जनरल इन्स्योरेन्स लगायतका कम्पनी आवद्ध भएका छन् ।
ईबीमा आफु सुचित भएर बीमा किन्न सकिने प्लेटफर्म भएको ईबीमाका सह-संस्थापक तथा प्रबन्ध निर्देशक रोशन प्रसाद ज्ञवालीले बताए ।
प्रबन्ध निर्देशक ज्ञवाली
सन् २०१५ मा ईबीमा स्थापना भएपनि यसका सुरूवाती दिन भने सन्तोषजनक रहेनन् । लाइसेन्सदेखि जनशक्तिको समस्या कम्पनीले फेस गर्यो । तर पनि बीमा क्षेत्रमै केही गर्ने दृढ अठोटका साथ सुरू भएको ईबीमा विभिन्न चुनौतीलाई पन्छाउँदै आजको दिनसम्म आइपुगेको छ ।
‘बीमा क्षेत्रलाई डिजिटल बनाउने हाम्रो सपना छ । त्यो सपना साकार पार्न देखिएका चुनौतीसँग लड्दै यहाँसम्म आईपुगेका छौं,’ ज्ञवालीले आइसिटी समाचारसँग भने, ‘त्यसको प्रतिफल स्वरूप आजको दिनमा ईबीमाले वार्षिक बीमितबाट करोडौंको प्रिमियम उठाउँदै आएको छ भने हजारौंलाई सेवा दिएको छ ।’
ईबीमाले सन् २०२० मा बीमा समितिबाट लाइसेन्स पाएको थियो । ईबीमाको मुख्य विशेषता भनेको ‘तुलना’ हो । यसमा विभिन्न कम्पनीका इन्स्योरेन्स पोलिसी तुलना गरेर खरिद गर्न सकिन्छ ।
ईबीमाबाट प्रिमियम कति पर्छ, कुन कम्पनीको हो, कुनमा धेरै बोनस पाइन्छ, क्लेम सेटलमेन्ट लगायतका कुरा थाहा पाउन सकिन्छ । ईबीमामा रेटिङ पनि हेर्न सकिन्छ ।
ईबीमामा बीमा कम्पनीले ल्याएका प्लानको तुलनात्मक अध्ययन गरेर आफुलाई आवश्यक भएको प्लान खरिद गर्न सकिने उनी बताउँछन् ।
ईबीमाबाट बीमा लेख खरिद गर्ने ग्राहकलाई कम्पनीले फाराम भर्नेदेखि अन्य आवश्यक सहयोग गर्ने गर्दछ । ईबीमाबाट बीमा खरिद गरेपछि प्रयोगकर्ताका लागि छुट्टै ड्यासबोर्ड उपलब्ध हुनेछ । उक्त ड्यासबोर्डमा आफ्नो बीमाको सम्पूर्ण जानकारी पाइन्छ । ईबीमाले बीमा साक्षरतामा पनि काम गरिरहेको छ ।
देशैभर बीमा साक्षरतालाई फैलाउन कम्पनीले काम गरिरहेको ज्ञवालीको भनाइ छ । ‘हामी देशैभर बीमा साक्षरता फैलाउन लागिरहका छौं । त्यस अनुसार विभिन्न संस्थासँग सहकार्य गर्नेदेखि आफै पनि बीमा साक्षरता सम्बन्धि कार्यक्रम आयोजना गर्ने योजनामा छौं,’ उनले भने ।
यदी कसैलाई बीमा बारे बुझ्नु परेमा कम्पनीले पर्सनलाइज्ड मान्छे पनि घरमै पठाउने गरेको छ । कम्पनीले बीमा बारे बुझ्न चाहने मान्छेलाई कार्यालयमा बोलाएर पनि परामर्श दिइरहेको हुन्छ ।
बीमा समितिबाट अभिकर्ताको लाइसेन्स पाएका एजेन्टहरु पनि ई-बीमामा आबद्ध हुन सक्नेछन् । आवद्ध भएपछि सबै जीवन बीमा कम्पनीको बीमालेख बिक्री गर्न पाउने सुविधा ई-बीमाले उपलब्ध गराएको छ ।
ईबीमामा एजेन्टलाई छुट्टै ड्यासबोर्ड उपलब्ध गराइन्छ, जहाँ उनीहरूले बिक्री गरेको बीमा लेखको बारेमा सबै जानकारी पाउँछन् ।
अहिले बीमा पोलिसी खरिद गरेपछि दावी भुक्तानीका लागि धेरै दिनसम्म बीमा कम्पनीमा धाउनुपर्ने अवस्था छ । दावी भुक्तानीका लागि अनेकौं झन्झट छन् । यही समस्यालाई समाधान गर्न ईबीमाले दावी भुक्तानीको सेवा ल्याउने जनाएको छ ।
ईबीमामा छिट्टै क्लेम सेटलमेन्टको सुविधा पनि उपलब्ध हुने प्रबन्ध निर्देशक ज्ञवालीले बताए । उनका अनुसार यो सेवा उपलब्ध भएपछि ईबीमाबाट केही घण्टामै दावी भुक्तानी गर्न सकिने छ ।
ईबीमाले हाल इटहरीमा आफ्नो शाखा कार्यालय खोलेको छ भने बुटवल र पोखरामा खोल्ने तयारी गरेको छ । अबका दिनमा आक्रामक रूपमा बजारमा जाने कम्पनीको योजना छ । ईबीमामा हाल ३५ जनाले रोजगारी पाएका छन् ।
ईबीमाको सेवा अहिले वेबसाइटबाट लिन सकिन्छ । अबको केही समयमै कम्पनीले ईबीमाको मोबाइल एप पनि सार्वजनिक गर्ने तयारी गरेको छ ।
