आईसीटी समाचार
नेपाल दूरसञ्चार प्राधिकरणले डिजिटल केवाईसी तयार गर्ने भएको छ । यसका लागि प्राधिकरणले बुधबार एक सूचना प्रकाशित गर्दै अन्तर्राष्ट्रिय परामर्शदाताको आशयपत्र माग गरेको छ ।
प्राधिकरणले डिजिटल केवाईसीको डिजाइन, विकास, एकीकरण कार्यान्वयन, सञ्चालन र सहयोगका लागि परामर्शदाता माग गरेको हो ।
डिजिटल केवाईसी लागु भएपछि सीम कार्ड निकाल्न नागरिकता, फोटो बोकेर टेलिकम अफिस जानु पर्ने बाध्यताको अन्त्य हुने प्राधिकरणले जनाएको छ ।
डिजिटल केवाईसी लागु भएपछि सीम निकाल्न राष्ट्रिय परिचयपत्र ल्याए पुग्नेछ । त्यसका लागि टेलिकम क्षेत्रको केन्द्रीतकृत डिजिटल केवाईसीको डेटा प्राधिकरणमा हुनेछ । त्यो डेटा राष्ट्रिय परिचयपत्रमा जोडिने छ । राष्ट्रिय परिचयपत्रमा जोडिएपछि परिचयपत्र लिएर टेलिकमबाट सीम लिन पाइने छ ।
इच्छुक परामर्शदाताले आगामी अप्रिल २२ सम्म आशयपत्रको प्रस्ताव पेश गर्न सक्ने छन् । आशयपत्रको मूल्यांकन ४० प्रतिशत योग्यता, ५० प्रतिशत अनुभव र १० प्रतिशत क्षमताको आधारमा हुनेछ ।
आशयपत्रमा पास हुन न्यूनतम अकं ६० रहेको छ । त्यसपछि शर्टलिष्ट भएका परामर्शदातालाई मात्रै आर्थिक र प्राविधिक प्रस्ताव पेश गर्न अनुरोध गरिने छ ।
