आईसीटी समाचार
काठमाडौं महानगरका नवनिर्वाचित मेयर बालेन्द्र शाहले महानगरबासीको गुनासो लिन कलसेन्टर स्थापनाको प्रस्ताव गरेका छन् ।
महानगरको पहिलो कार्यपालिका वैठकमा मेयर शाहले यस्तो प्रस्ताव राखेका हुन् । महानगरको गुनासो लिन स्थापना हुने उक्त कल सेन्टरमा मेयर, उपमेयर तथा ३२ ओटै वडाका अध्यक्षहरुको पहुँच हुने उनले बताएका छन् ।
‘महानगरको कल सेन्टरमा ३२ ओटा वडाकै डेटाबेस हुनेछ,’ प्रत्यक्ष प्रशारित प्रथम कार्यपालिका वैठकमा बोल्दै मेयर शाहले भने, ‘सबै वडाका अध्यक्षले आआफ्नो वडाका गुनासोहरुलाई हेर्नसक्ने छन् । महानगरका मेयर उपमेयरले ३२ ओटै वडाका गुनासो हेर्न र त्यसको प्रत्यक्ष निगरानी समेत गर्न सक्ने छन् ।’
साथै कलसेन्टरमा आएका वास्तविक र गम्भिर गुनासोलाई फिल्टर गरेर हेर्ने समेत सुविधा उक्त प्रणालीमा हुने उनले बताएका छन् ।
महानगरको आफ्नो भिजन एजेण्डामै रहेको उक्त कल सेन्टरको अवधारणालाई मेयर शाहले प्रथम कार्यपालिका वैठकमा कार्यन्वयनका लागि प्रस्ताव गरेका हुन् ।
साथै उनले कल सेन्टरकै प्रणालीभित्र ‘इन्फ्रास्ट्रक्चर एम्बुलेन्स’ पनि सञ्चालन गर्ने बताएका छन् । जसमा महानगरबासीहरुले आफ्नो क्षेत्रमा देखा परेका भौतिक संरचनासम्बन्धि समस्याहरुको समाधान गर्न कल सेन्टरमार्फत सम्पर्क गर्न सक्ने छन् ।
प्रतिक्रियामा महानगरले इन्फ्रास्ट्रक्चर एम्बुलेन्स परिचालन गरी ती समस्याहरुको सम्बोधन गर्ने उनले बताए ।प्रारम्भिक चरणमा यस्ता दुईओटा एम्बुलेन्स परिचालन गर्ने मेयर शाहको भनाई छ ।
