आईसीटी समाचार
नेपाल उद्योग परिसंघ युवा उद्यमी मञ्च (सीएनईवाईईएफ) ले नेपाल स्टार्टअप फेस्ट २०२२ आयोजना गर्ने भएको छ । स्टार्टअपको प्रवर्द्धनका लागि सीएनईवाईईएफले स्टार्टअप फेस्ट आयोजना गर्न लागेको हो ।
आउँदो असार ११ गते सोल्टी होटेलमा आयोजना हुने उक्त कार्यक्रममा करिब ३००० स्वदेशी तथा विदेशी उद्यमी, लगानीकर्ता, विद्यार्थी, बुद्धिजीवी, पत्रकार आदिको सहभागिता रहने आनुमान गरिएको छ ।
लगानीका लागि स्टार्टअप फेस्टमा आउने स्टार्टअपहरूले लगानी समेत पाउने छन् । त्यसका लागि अहिलेसम्मब करिब ५० करोड लगानीको प्रतिबद्धता आएको छ ।
लगानीका लागि अनलाइनबाट यहाँ क्लिक गरी प्रस्ताव पेस गर्न सकिने छ । लगानीका लागि टीम भेन्चर, ग्लोबल इक्वीटी फन्ड, अध्यान्त फन्ड म्यानेजमेन्ट, हिमालयन क्यापिटल टेलीभेन्चर पार्टनरले संयुक्त रुपमा करिब ५० करोडको आशयपत्रमा हस्ताक्षर भएको सीएनईवाईईएफका निवर्तमान अध्यक्ष चाङ अग्रवालले बताए ।
यसका साथै नेपाल प्राइभेट इकुइटी एशोसिएसन, इम्प्याकट हब, रोबोटिक्स एशोसिएसन नेपाल र आन्टरप्रेरणा सँगपनि सहकार्य गर्न सम्झौता गरेको सीएनईवाईइएफले जनाएको छ ।
त्यसैगरी कार्यक्रममा स्टार्टअप अफ दि एयर,स्टार्टअप पर्सन अफ दि एयर, बेस्ट इन्नोभेसन अवार्ड, कस्टुमर एक्सिलेन्स अवार्ड, ग्रीन अवार्ड, बेस्ट प्लेस टु वर्क र सोसल आन्ट्रप्रेनरसीप अवार्ड गरी ७ विधामा ७ ओटा स्टार्टअपलाई अवार्ड पनि प्रदान गरिने आयोजकले जनाएको छ ।
यसका साथै उक्त कार्यक्रममा प्यानल डिस्कसन, इन्भेस्टर्स डेटिङ, रोबोटिक फुटबल, ड्रोन एक्टीभिटिज, म्युजिकल कन्सर्ट हुनेछन् । एकदिन चल्ने उक्त कार्यक्रममा ५० भन्दा धेरै स्टार्टअपले आफ्नो वस्तु तथा सेवा प्रदर्शनीमा राख्ने व्यवस्था गरिएको छ ।
