आईसीटी समाचार
नेपाली कांग्रेसका महामन्त्री तथा प्रतिनिधि सभाका सदस्य गगन कुमार थापाले एक महिनाभित्र इम्बोस्ड नम्बर प्लेट जडान अनिवार्य गर्ने सरकारको निर्णयप्रति आपत्ति जनाएका छन् ।
प्रतिनिधिसभाको सोमबारको बैठकमा बोल्दै बागमती र गण्डकी प्रदेशका सवारीसाधनमा अनिवार्य इम्बोस्ड नम्बर प्लेट जडान नगर्नेलाई दण्ड, जरिवाना डर देखाउँदै नागरिकलाई तर्साउन सरकारले सजिलो बाटो समातेको बताएका हुन् ।
यातायात व्यवस्था विभागले शुक्रबार एक सूचना प्रकाशित गर्दै बागमती र गण्डकी प्रदेशका कार्यालयमा दर्ता भएका सवारीसाधनले असार मसान्तसम्म इम्बोस्ड नम्बर प्लेट जडान गर्नुपर्ने बताएको थियो । यदी असार मसान्तसम्म इम्बोस्ड नम्बर प्लेट जडान नभए साउनदेखि कारबाही गर्ने चेतावनी दिएको थियो ।
‘अबको १५ महिनामा २५ लाख सवारीसाधनमा जोड्ने भनेको छ । दिनको ५ हजार ५ सय, कसरी छ सम्भव छ ?,’ थापाले भने, ‘दिनरात लाइन बस्नुपर्छ र अन्तिममा नम्बर प्लेट पनि जडान हुँदैन् ।’
मंहगो पैसा तिरेर प्लेट लिएको तर यसको गुणस्तर नभएको नागरिकको गुनासो रहेको उनले बताए । ‘जुन कम्पनीले ठेक्का पाएको छ । कम्पनीमाथि प्रश्न छ । जुन प्रकृतीको सम्झौता भएको छ त्यसमा प्रश्न छ’ उनले भने ।
थापाले बंगलादेश र इजरायलमा त्यहाँको मातृभाषामा हुने नेपालमा देवनागिरी लिपीमा किन भएन् प्रश्न गरे । राज्यले संवाद गरेर नागरिकहरूलाई विश्वासमा लिनुपर्ने ठाउँमा तयार गर्नुपर्ने पूर्वाधार तयार नगरेको उनको भनाइ छ ।
अन्य देशको तुलनामा ५-६ गुणा बढी पैसा लिएर साउन १ गते भित्र अनिवार्य जडान गर्नुपर्ने सरकारको भाषा गतल रहेको बताए ।
‘यसको तत्काल पुनरावलोकन होस् । यसलाई सस्तो पनि बनाइ्योस र सबैभन्दा ठूलो कुरा नागरिकलाई सास्ती दिने काम नगरियोस्,’ उनले भने, ‘यसलाई सजिलो बनाइयोस् । पूर्वाधार तयार गरियोस् । जनशक्ति थपियोस् ।’
