आईसीटी समाचार
नेपाल दूरसञ्चार प्राधिकरणले अनुमतिपत्र लिएर मात्रै इन्टरनेट सेवा सञ्चालन गर्न अनुरोध गरेको छ । प्राधिकरणले एक सूचना जारी गर्दै अनुमति नलिएर इन्टरनेट सेवा सञ्चालन गर्नेलाई कानुन बमोजिम कारबाही गर्ने चेतावनी दिएको हो ।
दूरसञ्चार ऐन, २०५३ को दफा २१ बमोजिम कसैले पनि अनुमतिपत्र नलिई दूरसञ्चार सेवा सञ्चालन गर्न नपाइने कानुनी व्यवस्था रहेको छ ।
हाल सामाजिक संजालहरुमा स्याटेलाइट प्रविधिबाट इन्टरनेट सेवाको संचालन/वितरण सम्बन्धमा विज्ञापन हुने गरेको पनि भन्ने बुझिन आएकोले कोही कसैले अनुमतिपत्र प्राप्त नगरी इन्टरनेट सेवा संचालन नगर्न प्राधिकरणले सूचना जारी गरेको हो ।
अनुमतिपत्र प्राप्त नगरी इन्टरनेट सेवा संचालन गर्ने/गराउने जस्ता गैरकानूनी कार्य गरेको पाइएमा प्रचलित कानून बमोजिम कारवाही हुने प्राधिकरणले जनाएको छ ।
सेवाग्राहीहरुलाई भ्रममा नपर्न र नेपाल दूरसंचार प्राधिकरणबाट अनुमतिपत्र प्राप्त नगरी गैरकानूनी रुपमा कसैले पनि इन्टरनेट सेवा संचालन गरेको भए जानकारी दिन प्राधिकरणले अनुरोध गरेको छ ।
