६० हजारबाट सुरू भएको इन्फोडेभलपर्स २० औं वर्षमा प्रवेशः ३५० बढीलाई रोजगारी, करोडौंको कारोबार 

सूचना प्रविधि कम्पनी इन्फोडेभलपर्स १९ वर्ष पूरा गरी २० औं वर्षमा  प्रवेश गरेको छ । २०५९ साल असार २१ गते स्थापना भएको इन्फोडेभलपर्सले नेपालको अग्रणी सूचना प्रविधि कम्पनी हो ।

एउटा कोठाबाट ६० हजार रुपैयाँको लगानीमा सुरु भएको कम्पनीले अहिले लाखौ मानिसलाई डिजिटल सेवासँग जोडिरहेको छ भने ३५० बढिलाई प्रत्यक्षरुपमा रोजगारी दिइरहेको छ ।

सुरुवाती दिनमा सहकारी तथा माइक्रोफाइनान्सलाई प्राथमिकतामा राखेर काम गरेको कम्पनीले पछिल्लो समय आफ्नो दायरा फराकिलो बनाउँदै गएको छ ।

कम्पनीले माइक्रोफाइनान्स तथा सहकारीका लागि कोर बैंकिङ सिस्टम, मोबाइल बैंकिङ, ब्रान्चलेस बैंकिङ, मर्चेन्ट बैंकिङ सिस्टम विकास गरी सेवा प्रदान गर्दै आइरहेको छ ।

विदेशी सफ्टवेयरहरुको दवदवा रहेको नेपालमा स्वदेशी प्रडक्टमाथि विश्वास दिलाउन कम्पनीको प्रयास र भुमिका उल्लेखनीय छ । वार्षिक ५० करोड रूपैयाँको कारोबार गर्ने इन्फोडेभलपर्सको सेवा नेपालमा मात्र होइन् भुटान, भारत तथा अमेरिकामा पनि विस्तार भएको छ ।

कम्पनीले अबको १ वर्षमा संस्थालाई पूर्ण डिजिटाइज गर्ने र १ अर्ब रूपैयाँको कम्पनी बनाउने लक्ष्य लिएको छ । त्यस्तै आगामी आर्थिक वर्षमा अनुसन्धान तथा विकासमा जोड दिने, नयाँ नयाँ प्रविधिमा लगानी गर्ने र दायरा अझै बढाउने कम्पनीको योजना छ ।