आईसीटी समाचार
बाघचाल, सानो छँदा तपाईहरू धेरैले खेल्नु भएको होला । रणनीतिक चालका साथ खेलिने बाघचाल खेलमा ४ वटा बाघ र २० बाख्रा हुन्छन् ।
यस खेलमा बाघले बाख्राको शिकार गर्न खोज्छ भने बाख्राहरुले पनि आफ्नो प्रतिरक्षा गर्दै, चलाखीपूर्ण ढंगले बाघलाई आफ्नो क्षेत्रभित्र ल्याएर घेराबन्दीमा हाली शिकार गर्छन् । वास्तवमा बाघचाल नेपालको रैथाने खेल र हाम्रो संस्कृति हो ।
पहिले पहिले बाघचाल चौतारीमा बसेर खेलिन्थ्यो तर पछिल्लो समय बाघचाल खेल्ने प्रचलन हराउँदै गएको छ । नयाँ पुस्तालाई यो खेलको बारेमा थाहा पनि छैन् ।
नेपालको रैथाने खेल बाघचाललाई पुनर्जीवित गर्न काठमाडौंका भुपाल सापकोटाले अनलाइनबाटै बाघचाल खेल्न मिल्ने वेबसाइट बाघचाल डटनेट पुनः सार्वजनिक गरेका छन् ।
कम्प्युटर प्रोग्रामर समेत रहेका उनले सन् २०१२ मा यस गेमलाई सार्वजनिक गरी अनलाइनबाट खेल्न सकिने सुविधा दिएका थिए तर उक्त वेबसाइट सन् २०१५ सम्म मात्र चल्यो । रोजगारीका लागि सापकोटा विदेशिनु परेपछि राम्ररी चलिरहेको बाघचाल डटनेट बन्द हुन पुग्यो ।
‘म नेपाल बाहिर थिए । त्यसपछि हेर्ने मान्छे भएन् र बन्द भयो,’ सापकोटाले आइसिटी समाचारसँग भने । आफैले सुरू गरेको परियोजना बाघचाल डटनेटलाई त्यत्तिकै छाड्ने उनको इच्छा थिएन् ।
कतै न कतै यसलाई पुनः सुरू गर्ने हुटहुटी सापकोटाको मनमा थिए । त्यही हुटहुटीले गर्दा ७ वर्षअघि बन्द भएको बाघचाललाई उनले पुन सुरु गरे । यसपटक यसलाई परिमार्जन गरेर एक महिनाअघि सार्वजनिक गरेका हुन् ।
यसलाई परिमार्जन गरेर एक महिनाअघि पुनः सार्वजनिक गरिएको छ । अब बाघचालले पुनः पहिले झैँ प्रयोगकर्ताहरुको माया र नयाँ पहचिान पाउनेमा उनी आशावादी छन् ।
यसमा अकाउन्ट नबनाएर पनि बाघचाल खेल्न मिल्छ । तर अकाउन्ट नबनाए, आधारभूत तह मात्रै खेल्न मिल्छ । यदी तपाईले अकाउन्ट बनाउनु भयो भने मध्यम तहको बाघचाल खेल्न सक्नुहुन्छ भने अन्य अनलाइन प्लेयरसँग पनि खेल्न सक्नुहुन्छ ।
बाघचाल डटनेटमा च्याट गर्दै गेम खेल्न सकिने उनले जानकारी दिए । ‘यसमा आफुले खेलेका गेमहरू सेभ भएर बस्छन् । गेमहरूको रिप्ले पनि हेर्न सकिन्छ,’ उनी भन्छन्, ‘रिप्लेबाट सिकारू खेलाडीहरू सिक्न सक्छन् । रिप्ले वेबसाइटमा गएर, जसले पनि हेर्न सक्छ ।’
अहिलेसम्म वेबसाइटमार्फत २ हजार बढीले बाघचाल खेलेका छन् । बाघचाल गेमको एउटा मापदण्ड बनाउने आफ्नो योजना रहेको उनले सुनाए ।
‘अहिले धेरैले बाघचाल गेम बनाएका छन् । बाघचाल गेमको एउटा मापदण्ड बनाउन अनलाइन बाघचाल एक्सडचेन्ज लोकेसन बनाउँदै छु । यो भएमा अरूले बनाएका सिस्टमलाई पनि हाम्रोमा एकीकृत गर्न सकिन्छ । अरू डेभलपरसँग काम गरेर यसलाई अगाडि बढाउँदै छु,’ उनले भने ।’
अहिले वेबसाइटबाटै गेम खेल्न मिल्ने भएपनि अब विस्तारै मोबाइल एप सार्वजनिक गर्ने योजना सापकोटाको छ । यसलाई अहिले सापकोटाले साइड प्रोजेक्टको रूपमा अगाडि बढाइरहेका छन् ।
