आईसीटी समाचार
पछिल्लो समय नेपालमा राइड शेयरिङ सेवा लोकप्रिय हुँदै गइरहेको छ । विशेष गरी काठमाडौं उपत्यकामा यस्तो सेवा धेरै लोकप्रिय छ । राइड शेयरिङका लागि धेरै कम्पनीहरू बजारमा छन् ।
नेपाली राइड शेयरिङ बजारमा ‘इनड्राइभर’ नामक अन्तर्राष्ट्रिय कम्पनी पनि प्रवेश गरेको छ । गत अप्रिलदेखि नेपालमा सेवा दिन थालेको छ । तर अफ्रिलदेखि सेवा सुरू गरेको इनड्राइभर नेपालमा दर्ता नभएको भन्दै तीब्र आलोचना भइरहेको छ ।
आलोचनाका बीच इनड्राइभरले भने नेपालमा कम्पनीका दर्ताको प्रक्रिया सुरू गरेको जानकारी दिएको छ । इनड्राइभरकी दक्षिण एशिया जनसम्पर्क व्यवस्थापक पवित नन्दा यतिबेला नेपालमा छिन् । आइसिटी समाचारसँगको भेटघाटमा उनले नेपालमा दर्ताको प्रक्रिया सुरू भएको जानकारी दिइन् । चाँडै नेपालमा इनड्राइभरले कार्यालय पनि स्थापना गर्दैछ ।
‘हामीले अवैध काम गरेका छैनौं र फेक पनि होइनौं । नेपालमा गम्भीर भएरै काम गरिरहेका छौं,’ उनले आइसिटी समाचारसँग कुरा गर्दै भनिन्, ‘चाँडै हामी नेपालमा कार्यालय पनि राख्दै छौं ।’
इनड्राइभर अप्रिलदेखि नेपालमा आधिकारिक रूपमा सार्वजनिक भएको हो । त्यसभन्दा अगाडि बेटा परीक्षणको रूपमा सेवा सुरू गरेको थियो । नेपालसहित ४२ वटा देशमा सञ्चालन भइरहेको इनड्राइभरका १०० मिलियन प्रयोगकर्ता छन् ।
काठमाडौं उपत्यकामा सेवा सुरू गरेको इनड्राइभरले कम्तिमा ६ महिना कमिसन नलिने घोषणा गरेको छ । त्यसपछि पनि अन्य राइड शेयरिङको तुलनमा शुल्क कमिसन कम नै हुने जनाएको छ । कम्पनीले नेपालमा राइड शेयरिङ, इन्टरसिटी र कुरियर सेवा उपलब्ध गराइरहेको छ ।
नेपालमा अहिले इनड्राइभरको सेवा उपलब्ध भएपनि बिजनेस सुरू नगरेको नन्दा बताउँछीन् । उनका अनुसार इनड्राइभरले अहिलेसम्म नेपालबाट आम्दानी गरेको छैन् र चाँडै बिजनेस मोडल सुरू गर्दैछ ।
इनड्राइभर अहिले नेपालमा इनड्राइभर भर्चुअल रूपमा सञ्चालन भइरहेको छ । तर ग्राहक सेवाका लागि इनड्राइभरले नेपालमा ‘डेडिकेटेड टिम’ राखेको छ ।
‘हामीले नेपालमा डेडिकेटेड टिम राखेका छौं, जसले अन्य शहरमा सेवा विस्तारैको अध्ययनका साथै ग्राहक सेवा उपलब्ध गराइरहेको छ,’ नन्दा भन्छिन् ।
ड्राइभर भेरिफिकेसन प्रक्रियामा समेत सो टिमले काम गरिरहेको छ । इनड्राइभरमा चालकलाई आवद्ध हुन केही समस्या भएमा टिमले सहजीकरण गर्ने बताइएको छ ।
इनड्राइभरमा भेरिफिकेसनका लागि फोटो, ड्राइभिङ लाइसेन्स, ब्लुबुक, नम्बर प्लेट देखिने गरि फोटो, ड्राइभिङ लाइसेन्स वा अन्य मान्यताप्राप्त राष्ट्रिय कार्डसहितको सेल्फी आवश्यक पर्छ ।
सबै डकुमेन्ट बुझिने गरी राखेपछि मात्रै इनड्राइभरमा चालक आवद्ध हुन सक्ने उनी बताउँछिन् । इनड्राइभरमा यात्रु र चालक दुवैले भाडाका लागि सम्झौता गर्न सक्छन् ।
यदी एउटा यात्रुले एउटै मूल्यमा धेरैवटा प्रस्तावहरू प्राप्त गरेमा व्यक्तिले चालक आउने समय, मूल्य, गाडी मोडेल र चालकको मूल्यांकनको आधारमा प्रस्ताव छनोट गर्न सक्छन् ।
केही समय अगाडि इनड्राइभरका चालक दुर्घटनापछि घाइतेलाई छोडेर भागेका थिए । त्यसपछि झनै इनड्राइभरको आलोचना भएको थियो । तर ग्राहकको सुरक्षालाई गम्भीरता पूर्वक लिएको नन्दाको भनाइ छ ।
‘इनड्राइभरलाई सुरक्षित बनाउन हामी प्रतिवद्ध छौं । हाम्रा लागि चालक र यात्रु दवै ग्राहक हुन्,’ उनी भन्छिन्, ‘हामीले ड्राइभर हायर गरेका छैनौं । ग्राहकको सुरक्षाका लागि हाम्रो टिम २४ सै घण्टा तल्लिन छ ।’
यदी दुर्घटना भएमा मोबाइल एपबाटै नजिकैको प्रहरी कार्यालयलाई सम्पर्क गर्न सकिन्छ । त्यसपछि इनड्राइभरले आवश्यक सेवा उपलब्ध गराउनेछ । नेपालमा सेवा सुरू गरेपछि कम्पनीले संस्थागत सामाजिक उत्तरदायित्व (सीएसआर) अन्तर्गत विभिन्न कार्यक्रम गर्न सुरू गर्ने तयारी गरेको छ ।
सीएसआर अन्तर्गत नेपालमा २ वटा कार्यक्रम सुरू गर्न लागेको नन्दाले बताइन् । कम्पनीले यो वर्षको अन्त्यमा महिला प्रविधि उद्यमीका लागि इनड्राइभर टेक अवार्ड्स गर्दैछ भने गाउँगाउँका विद्यार्थीका लागि ‘बिगिन आईटी’ कार्यक्रम पनि सुरू गर्दैछ । सन् २०१२ मा विश्वव्यापी रूपमा सुरू भएको बिगिन आईटी कार्यक्रममा अनाथालय र गाउँ गाउँका विद्यालयहरूलाई प्रविधिसँग जोड्ने गर्दछ ।
यसका लागि वेबसाइटमा गएर रजिष्टर गर्न सकिन्छ । त्यसपछि इन्ड्राइभरले सम्पर्क गर्नेछ । सहभागी विद्यालयलाई इनड्राइभरले प्राविधिक उपकरण, प्रोग्रामिङ पाठ्यक्रम र तालिमका लागि आर्थिक सहायता प्रदान गर्नेछ ।
यो पनि पढ्नुहोस्ः चालकबाट ६ महिनासम्म कमिसन लिदैनौं, त्यसपछि पनि अरूको तुलनामा कम हुनेछः पवित नन्दा (अन्तर्वाता)
चालकको आईडी प्रमाणीकरणका लागि कुनै पनि शुल्क लिदैनौः इनड्राइभर
