आईसीटी समाचार
मानसिक स्वास्थ्य विशेषज्ञहरुको जानकारी दिने गरी नेपाल मेन्टल हेल्थ डटकम वेबसाइट सार्वजनिक भएको छ । नेपाल मानसिक स्वास्थ्य पहलले मानसिक स्वास्थ्य जानकारी दिन उक्त वेबसाइट सुरू गरेको हो ।
सो पहलमा मानसिक स्वास्थ्यको क्षेत्रमा रहेको विभिन्न विषयहरुमा काम गर्न भनेर छ वटा संस्थाहरू ग्लोबल सेपर्स काठमाडौं हब, अन्तरङ, युवा, ह्याप्पी माइन्ड्स, नेपाल इन्स्टिच्युट फर रिसर्च एण्ड कम्युनिकेसन्स (एनआईआरसी), र पहिलो कदम आवद्ध रहेका छन् ।
नेशनल कलेज अडिटोरियम हलमा आयोजित एक कार्यक्रममा मानसिक स्वास्थ्य विशेषज्ञहरु, विभिन्न मानसिक स्वास्थ्य संस्थाका प्रतिनिधिहरू र अन्य सहभागीहरूकाबीच आईतबार वेबसाइट सार्वजनिक गरिएको छ ।
विगतमा यस्तै डाटाबेसहरू व्यक्तिगत र संगठनात्मक रुपमा निर्माण गर्ने प्रयासहरू भएपनि सामूहिक प्रयासमा बनाईएको भने यो पहिलो पटक हो ।
संस्थागत पहलका सदस्य सौरभ थापा श्रेष्ठले मानसिक स्वास्थ्य विशेषज्ञहरू खोज्नलाई सजिलैसँग जानकारी उपलब्ध गराउने गरी वेबसाइट ल्याएको बताए ।
वेबसाइटबाट प्रयोगकर्ताहरुलाई मानसिक स्वास्थ्य विशेषज्ञहरूको परामर्श समयदेखि शुल्क र वेबसाइटमा रहने अध्ययनका स्रोतहरूसम्मको जानकारी पाइने छ । यसमार्फत प्रयोगकर्ताहरुले फारम भरेर अन्य उल्लेख नभएका विशेषज्ञहरुलाई पनि सिफारिस गर्न सक्छन् ।
कार्यक्रममा मानसिक स्वास्थ्यमा डाटाबेसको महत्व बारे छलफल समेत भएको थियो । छलफलमा आयोजक संस्थाका प्रतिनिधिहरु अन्ज पौडेल, पहिलो कदम, सुनिता श्रेष्ठ, अन्तरङ, द्रोण उप्रेती, एनआईआरसी, ह्याप्पी माइन्ड्सबाट श्रेया गिरी र युवाबाट रिजु ढकाल रहेका थियो भने ग्लोबल सेपर्स काठमाडौं हबबाट गुञ्जन घिमिरे सहभागी थिए ।
वेबसाइटमा रहेका जानकारीहरु विशेष गरी सेवा खोज्ने प्रयोगकर्ताहरूका उपयोगि भएको रिजु ढकालले बताइन् । त्यस्तै हिलो कदमका क्षेत्रीय प्रमुख अनामिका नेहरेले नेपाल मानसिक स्वास्थ्य इनिसिएटिभदद्वारा आगामी दिनहरुमा मानसिक स्वास्थ्य अन्तर्गतका विषयहरुमा चेतना फैलाउने योजनाका रहेको जानकारी दिइन् ।
