आईसीटी समाचार
निजी क्षेत्रको मोबाइल सेवा प्रदायक एनसेलले सन् २०२२ को दोस्रो त्रैमासिकमा १० अर्ब ४६ करोड ६० लाख रूपैयाँ आम्दानी गरेको छ ।
एनसेलको मुख्य लगानीकर्ता आजियाटाले सार्वजनिक गरेको प्रतिवेदन अनुसार दोस्रो त्रैमासिकमा एनसेलले १० अर्ब ४६ करोड ६० लाख रूपैयाँ आम्दानी गरेको हो ।
गत आर्थिक वर्ष सोही अवधिमा एनसेलले १० अर्ब ५६ करोड ३० लाख रूपैयाँ आम्दानी गरेको थियो । चालु आर्थिक वर्षको सोही अवधिमा गत आर्थिक वर्षको सोही अवधिको भन्दा ९ करोड ७० लाख आम्दानी घटेको छ ।
कम्पनीका अनुसार भ्वाइस सेवाबाट हुने आम्दानी घट्दा कुल आम्दानी पनि घटेको हो । भ्वाइस सेवाबाट हुने आम्दानी घटेपनि डेटाबाट हुने आम्दानी भने बढेको छ ।
नेपाल दूरसञ्चार प्राधिकरणको जेठ महिनाको एमआईएस प्रतिवेदन अनुसार एनसेलका १ करोड ६८ लाख १६ हजार ९८५ ग्राहक रहेका छन् ।
यी मध्ये ७० लाख ५३ हजार ९२६ जनाले फोरजी प्रयोग गर्छन् भने १८ लाख ८ हजार ९४७ जनाले थ्रीजी प्रयोग गर्दै आएका छन् । नेपालमा एनसेलले कुल टेलिफोन बजारको ४०. ३२ प्रतिशत बजार हिस्सा ओगटेको छ ।
