सरकारले अब ३२ इन्चमाथिका रंगीन टेलिभिजन आयात खुला गरेको छ । ३२ इन्च माथिका रंगिन टेलिभिजनको आयात खुला गरेपछि ३०० डलर माथिका फोनमा प्रतिबन्ध भने कायमै रहेको छ ।
गत असार ३१ गतेदेखि राजपत्रमा सूचना प्रकाशित गर्दै सरकारले भदौ १४ गतेसम्मका लागि ३२ इन्च माथिका रंगिन टेलिभिजन र ३०० अमेरिकी डलर माथिका मोबाइलसहित १० प्रकारका सामान आयातमा रोक लगाएको थियो ।
त्यसपछि भदौ १५ गते राजपत्रमा सूचना प्रकाशित गर्दै ३२ इन्च माथिका रंगिन टेलिभिजन आयात खुलाए पनि ३०० अमेरिकी डलर माथिका मोबाइलको आयातमा प्रतिबन्ध कायमै राखेको छ । मोबाइल फोनमाथिको प्रतिबन्ध असोज २८ गतेसम्म लम्बिएको छ ।
यससँगै दशैंमा मिडरेञ्जका मोबाइल फोन आयात हुने छैनन् । त्यसो त सरकारले आयातमा प्रतिबन्ध लगाए पनि ३०० डलरमाथिका मोबाइल फोन बजारमा उपलब्ध रहेका छन् ।
विदेशी मुद्रा सञ्चिति घटेको भन्दै विलासी बस्तुको आयात रोक्न सरकारले विभिन्न शिर्षकका वस्तुमा लामो समयदेखि प्रतिबन्ध लगाउँदै आईरहेको छ ।
यसअघि पनि सरकारले वैशाख १३ गते राजपत्रमा सूचना प्रकाशित गर्दै असार मसान्तसम्मका लागि ६ सय डलरभन्दा महंगो फोनको आयातका लागि प्रतितपत्र नखोल्न बैंकहरुलाई निर्देशन जारी गरेको थियो ।
बजारमा अत्याधिक माग रहने मिडरेन्ज फोनकै आयातमा प्रतिबन्ध लगाएपछि फोनको कालोबजारी बढ्नेमा आधिकारिक विक्रेताहरु चिन्ता व्यक्त गर्न थालेका छन् ।