आईस्पानले भन्योः विद्युत प्राधिकरणले इन्टरनेटको तार काट्दा सेवा दिन समस्या भयो

नेपाल विद्युत प्राधिकरणले इन्टरनेट तार काट्दा सेवा प्रवाहमा अवरोध उत्पन्न भएको इन्टरनेट सेवा प्रदायक संघ (आइस्पान) नेपालले जनाएको छ ।

सोमबार काठमाडौंमा पत्रकार सम्मेलन गर्दै आइस्पानले विद्युत प्राधिकरणले तार काट्दा देशभर इन्टरनेट दिन समस्या भएको जानकारी दिएको हो ।

प्राधिकरणले एकतर्फी रुपमा विद्युत नियमन आयोग, नेपाल दूरसंचार प्राधिकरण, उपभोक्ताका प्रतिनिधित र सेवाप्रदायक सबैलाई वेबास्ता गरी OPGW, पोलको भाडा ६००-७०० प्रतिशत सम्म अचाक्ली वृद्धि गरेको थियो ।

त्यसपछि उक्त भाडादरको भार उपभोक्तामा पर्न जाने र यो कार्य डिजिटल नेपालको मर्म विपरित भएकाले राज्यको उच्चस्तरिय समिती गठन भई प्रतिवेदन दिएको थियो, जसमा विद्युत प्राधिकरणले आफैले सही छाप गरेको भए तापनि उक्त प्रतिवेदन कार्यान्वयन गर्न मानेको छैन् ।

प्रतिवेदन अनुसार कार्य नगरी प्राधिकरणले बढेको दर/रेट अनुसारको भाडा भुक्तानी गर्न दबाब दिइरहेको आईस्पानका अध्यक्ष सुधिर पराजुलीले बताए ।

विद्युत प्राधिकरणले भाडाकै निहुँमा इन्टरनेट सेवा प्रदायकहरुको डाटा सेन्टर, अपरेसनल पोइन्ट लगायत इन्टरनेट सेवा प्रवाह गर्ने तार छानिछानी काट्ने कार्य तिव्रता दिएको छ ।

यसरी अति आवश्यक इन्टरनेट सेवा अवरोध गर्दा उत्पन्न स्थितिको सम्पूर्ण जिम्मेवारी नेपाल विद्युत प्राधिकरणले लिनुपर्ने आईस्पानको भनाइ छ ।

देशमा अति आवश्यक इन्टरनेट सेवा प्रवाह गर्ने, देशमा इन्टरनेट सेवा ठप्प हुनबाट जोगाउन, मानव अधिकार स्थापित गर्न, उपभोक्ताको हकहित संरक्षण गर्न नेपाल सरकारको सम्बन्धित मन्त्रालयहरु, निकायहरु, मानव अधिकार (राष्ट्रिय/अन्तराष्ट्रिय) आयोगलाई अबिलम्ब आवश्यक हस्तक्षेपकारी भूमिका निर्वाह गर्न समेत आइस्पानले आह्वान गरेको छ ।