आईसीटी समाचार
गो एनीह्वेयर फाइल ट्रान्सफर सफ्टवेयर प्रयोग गर्ने कयौँ व्यवसायहरु र्यान्समवेयर आक्रमणमा परेका छन् । गो एनीह्वेयर फाइल ट्रान्सफर सफ्टवेयरमा बग आएपछि विश्वव्यापी रुपमा धेरै व्यवसायहरु र्यान्समवेयर आक्रमणले प्रभावित भएका छन् ।
यो आक्रमण रुससँग सम्बन्धित क्लप ग्यांगले सञ्चालन गरेको बताइएको छ भने आक्रमण ग्रसित संस्थाहरुको जानकारी डार्क वेबमा लिक गरिरहेको पाइएको छ ।
अझै पनि मागिएको रकम भुक्तानी नगरेमा चोरिएको फाइलहरु प्रकाशित गरिदिने ह्याकरहरुले धम्की दिईरहेका छन् । यी फाइलमा कर्मचारी तथा प्रयोगकर्ताहरुको निजी फाइल पनि रहेका छन् ।
यो आक्रमण जनवरी वा फेब्रुअरी तिर भएको थियो र ह्याकर समूहले १३० ओटा कम्पनी माथि र्यान्समवेयर आक्रमण गरेको खुलाएको छ ।
सेक्युरिटी रिपोटर ब्रायन क्रेब्सले यसबारेमा रिपोर्टिङ गरेपश्चात मात्रै यस घटनाबारे थाहा भएको हो । आक्रमणमा परेका धेरै संस्थाहरुले आफ्नो डेटा चोरी नभएको दावी गरिरहेका छन् ।
