आईसीटी समाचार
नेपालमा कोरोना महामारी संक्रमण तीव्र फैलिन थालेपछि सरकारले देशभर लकडाउनको घोषणा गर्यो । लकडाउनमा अत्यावश्यक बाहेकका कार्यालय बन्द भए । यो समयमा प्रविधि सारथी बन्न पुग्यो ।
लकडाउनमा प्रविधिबाट सकेसम्म कार्यालयको काम हुन थाल्यो । वर्क फ्रम होमको नयाँ सस्कृति विकास भयो ।
हुनत विश्व बजारमा धेरै पहिलेदेखि नै वर्कफ्रम होमको संस्कृति सुरू भए पनि नेपालमा भने कोरोना महामारीपछि सुरू भएको थियो । काठमाडौंका निराजन केसी पनि लकडाउनमा घरमै बसेर काम गरिरहेका थिए ।
घरबाटै काम गर्दा सञ्चार, फाइल शेयरिङ लगायतमा समस्या आउन थाल्यो । त्यसपछि यो समस्यामा निराजन घोत्लिन थाले । समस्याको समाधान गर्नतर्फ अग्रसर भए, अनि जन्मियो सन् २०२० मा ‘लेन्समी अप’ ।
लेन्समी अप नेपालको पहिलो भर्चुअल वर्कस्पेश प्लेटफर्म हो । कोरोना महामारीको समयमा घरबाट काम गर्दा एकअर्कासँग सञ्चार गर्न समस्या भएपछि लेन्समी अपको आईडिया आएको लेन्समी अपका संस्थापक तथा सीईओ निराजन केसीले बताए ।
.jpeg)
आईटी पढिरहेका निराजन लेन्समी अप सुरू गर्नुभन्दा आफ्नो एउटा टिम बनाएर फ्रिल्यान्सिङ काम गरिरहेका थिए । फ्रिल्यान्सिङ गरिरहेकै बेला उनीहरूलाई आफ्नै प्रडक्ट बजारमा ल्याउने योजना बनाए । त्यसैअनुसार ई-कमर्स ब्राण्ड ‘मगाउ’ सुरू गरे । तर मगाउ सोचे अनुसार सफल भएन र बिचैमा बन्द गर्नु पर्यो ।
मगाउ बन्द हुनुमा राम्रोसँग ‘कम्युनिकेसन’ नहुन पनि एउटा कारण भएको उनको भनाइ छ । मगाउ बन्द भएपछि फेरि उनीहरू फ्रिल्यान्सिङको रूपमा काम गर्न थाले ।
काम गरेर केही महिनालाई पुग्ने आर्थिक जोहो गरे र पुनः आफ्नै प्रडक्ट सुरू गर्ने योजना बनाए । लेन्समी अप, डेभलपमेन्ट र रिसर्चको कामसँगै अगाडि बढाए ।
लेन्समी अप क्लायन्ट र टिम बिचको मिडियटरको रूपमा सुरू गरिएको केसी बताउँछन् । ‘विशेष गरी मिडियटरको रूपमा लेन्समी अप बनाएका थियौं । क्लायन्ट र टिमलाई चिनाएपछि आफुलाई बाइपास नै गर्न सक्ने मिडियटरलाई चिन्ता हुन्थ्यो,’ उनले भने, ‘त्यसकारण क्लायन्ट र टिमलाई एउटै वर्कस्पेशमा ल्याउने र उनीहरूबीचको सञ्चारलाई राम्रो बनाउन योजनासहित लेन्समी अप सुरू भएको हो ।’
त्यो बेला लेन्समी अपबाट च्याट, कम्प्युनिकेस, फाइल शेयरिङ जस्ता सुविधा थियो । मिडियटरले मात्र आफ्नो क्लायन्ट र टिम देख्न पाउथ्यो । यो सुविधा एक दुई जना मिडियटरले प्रयोग गरेका थिए भने उनीहरूबाट राम्रो प्रतिक्रिया समेत प्राप्त भएको थियो ।
एक दिन निराजनले आफ्नो प्रडक्ट प्रज्ञान सुवेदीलाई देखाए । प्रज्ञानबाट उनले राम्रो प्रतिक्रिया पाए । तर उनले एउटा सुझाव दिए, ‘प्रडक्ट धेरै राम्रो छ । तिमीले किन मिडियटरलाई मात्रै केन्द्रित गरेका छौं । मिडियटरको बजारमा पनि सानो छ । त्यसकारण यसलाई अझै खुला बनाउ ।’
निराजन पनि प्रज्ञानको सुझावमा घोत्लिए । अनि यसअघि मिडियटरका लागि बनेको लेन्समी अपलाई प्रविधि कम्पनीका लागि पनि खुला गर्ने योजना बनाए र त्यसैअनुसार सफ्टवेयरमा नयाँ अपडेट ल्याए ।
त्यसपछि सुझाव र प्रतिक्रियाका लागि आफ्ना अग्रहरूलाई प्रडक्ट देखाए । त्यहाँबाट पनि सुझाव आयो, ‘यसलाई टेक कम्पनीमा मात्रै केन्द्रित नगरी सबै क्षेत्रले प्रयोग गर्न मिल्ने गरी नयाँ अपडेट ल्याउ । अन्य क्षेत्रलाई पनि यस्तो प्रडक्टको आवश्यकता छ ।’
उक्त सुझावलाई पनि निराजनलाई राम्रो लाग्यो र आत्मसात गरे । अनततः अग्रजहरूको सल्लाह र सुझावसहित सबै क्षेत्रले प्रयोग गर्न सक्ने भर्चुअल वर्कस्पेशको रूपमा लेन्समी अप तयार भएको उनी बताउँछन् ।
यसमा च्याट ड्राइभ, प्रोजेक्ट म्यानेजमेन्ट टूल, डिभाइस ट्रयाकिङ्ग, सेटिङ्ग, ट्रयाकिङ, भिडियो कन्फेरेन्सिङ्ग, रियल टाइम च्याट, स्मार्ट अलर्ट, एक्सेस कन्ट्रोल जस्ता विभिन्न फिचरहरू छन् । वर्कस्पेशमा आइसोलेसन नामक टगलको सुविधा समेत छ ।
यो टगल अन गरेर सदस्यहरुलाई गोप्य राख्न सकिन्छ भने यदी अफ गरेमा भर्चुअल वर्कस्पेसको रूपमा प्रयोग गर्न सकिन्छ । यसमा आवश्यकता अनुसार धेरै वर्कस्पेश पनि सिर्जना गर्न सकिन्छ । यसमा कुराकानीमा कुन शब्द प्रयोग गर्न दिने वा नदिने भनेर पहिले नै रिष्ट्रिक्सन गर्न सकिन्छ ।
लेन्समी अफ हाल ३-४ वटा कम्पनीले प्रयोग गरिरहेका छन् । प्रयोगकर्ताको चाहना अनुसार युआई/युएक्स डिजाइन गरिरहेको केसीले बताए ।
‘सबै क्षेत्रका कम्पनीलाई चलाउन सजिलो हुने गरी रिडिजाइन गरिरहेका छौं,’ उनी भन्छन्, ‘चैत अन्तिमसम्ममा युआईरयुएक्स परिमार्जन हुन्छ । अनि वैशाखदेखि लाइभ हुन्छ ।’
.jpg)
लेन्समी अप प्रयोगका लागि कम्पनीले बैंक, फिनटेक कम्पनी, टेक र स्टार्टअपहरूसँग कुराकानी गरिरहेको छ । संस्थाहरूलाई केही समय ट्रायलको रूपमा निःशुल्क प्रयोग गर्न दिने गरी काम अगाडि बढेको छ । लेन्समी अपमा वर्कस्पेशको ओनरलाई निगरानीको लागि बढी सुविधा दिइएको छ ।
आवश्यकता अनुसार प्लेटफर्मलाई इन्नोभेटिभ बनाउने र नयाँ फिचरहरू थप्ने काम भइरहेको केसीले बताए । अहिले उनीहरूले बिल्ड योर ओन सिस्टम बनाइरहेका छन् ।
यसमा कम्पोनेन्ट लेन्समी अपले उपलब्ध गराउने छ भने ग्राहकले आवश्यकता अनुसार टेम्पलेट डिजाइन गर्न सक्ने छन् । विदेशमा समेत सेवा विस्तार गर्ने योजना रहेको छ ।
लेन्समी अप निःशुल्क र प्रिमियम दुबैमा उपलब्ध हुनेछ । निःशुल्क प्रयोग गर्नेले फिचरमा केही सिमितता पाउनेछन् । वेबसाइटमा मात्रै उपलब्ध रहेको लेन्समी अपलाई छिट्टै मोबाइल एपमा ल्याउने तयारी भइरहेको कम्पनीले जानकारी दिएको छ ।
