आईसीटी समाचार
सञ्चार तथा सूचना प्रविधि मन्त्रालयले प्रदान गर्ने राष्ट्रिय सूचना तथा सञ्चार प्रविधि पुरस्कार (राष्ट्रिय आइसिटी अवार्ड) का लागि आवेदन दिने अन्तिम समय अब २ दिन मात्रै बाँकी रहेको छ ।
गत चैत २३ गतेदेखि खुला भएको राष्ट्रिय सूचना तथा सञ्चार प्रविधि पुरस्कारका लागि वैशाख ७ गतेसम्म आवेदन दिन सकिने छ ।
नेपालमा सूचना तथा सञ्चार प्रविधिको विकास तथा प्रवर्द्धनका लागि सरकारले हरेक वर्ष मे २ तारिखलाई राष्ट्रिय सूचना तथा सञ्चार प्रविधि दिवसको रूपमा मनाउँदै आएको छ ।
उक्त दिवसको अवसरमा नेपालको सूचना तथा सञ्चार प्रविधिमा विशेष योगदान पुर्याउने व्यक्ति तथा संघसंस्थाहरू मध्येबाट सर्वोत्कृष्टलाई राष्ट्रिय आइसिटी पुरस्कार दिइने मन्त्रालयले जनाएको छ ।
यस वर्ष सरकारले यस वर्ष पाँच विधा नेसनल आइसिटी एक्सिलेन्स अवार्ड, नेसनल आइसिटी एक्सिलेन्स अवार्ड (वुमन), नेसनल आइसिटी इनोभेसन अवार्ड, नेशनल आइसिटी अवार्ड (पब्लिक सेक्टर) र नेसनल आइसिटी अवार्ड (प्राइभेट सेक्टर) मा राष्ट्रिय आइसिटी अवार्ड प्रदान गर्दै छ ।
माथिका यी अवार्डमा इच्छुकले आवेदन पेश गर्न सक्नेछन् । आवेदकले भर्नुपर्ने फारामको ढाँचा मन्त्रालयको वेबसाइट र सूचना प्रविधि विभागको वेबसाइट मा उपलब्ध रहेको छ ।
इच्छुक सार्वजनिक संस्था/कार्यालय/कम्पनी तथा व्यक्तिहरूले वैशाख ७ गतेभित्र इमेल [email protected] वा मन्त्रालयको सूचना प्रविधि महाशाखामा आवेदन दर्ता गराउन सकिने छ ।
