आईसीटी समाचार
प्रतिनिधि सभा सदस्य असिम शाहले नेपालमा उत्पादन भएको सवारीसाधनलाई नम्बर प्लेट दिने कानुन नहुँदा खरिदकर्ताले दुख पाएको बताएका छन् ।
बुधबार प्रतिनिधिसभामा बोल्दै सांसद साहले स्वदेशमा उत्पादन भएका सवारीसाधनलाई सवारी दर्ता प्रमाणपत्र (नम्बर प्लेट) दिने कानुन नहुँदा खरिदकर्तालाई दुख भएको र त्यसका लागि छुट्टै ऐन बनाउने तत्काल गर्न ध्यानाकर्षण गराएका हुन् ।
यातायात व्यवस्थापन कार्यविधि निर्देशिका २०६० (संसोधन २०७४) मा सवारी दर्ताको भन्सार प्रज्ञापनपत्र र भन्सार महसुस अनिवार्य गरिएको छ । यही बाध्यात्मक व्यवस्थाका कारण स्वदेशमै बन्ने सवारीसाधनले नम्बर प्लेट पाउन सकेका छैनन् ।
‘नेपालमा चल्ने सवारी साधन विदेशबाटै आउनुपर्छ भन्ने हाम्रो कानुनको परिकल्पनामा रहेछ । कानुनी मान्यता नदिएपछि नेपालमा उत्पादित सवारी साधनले दर्ताको प्रमाणपत्र (नम्बर प्लेट) पाउन सकेका छैनन्,’ उनले भने, ‘नम्बर प्लेट नपाउँदा ख़रिदकर्तालाई ट्राफिकले दुख दिने गरेको छ ।’
नेपालको कानुनले स्वदेशमा बनेको सवारीसाधनलाई नम्बर प्लेट दिने परिकल्पना गरेको छैन् । तर पछिल्लो समय नेपालमै सवारीसाधन उत्पादन हुन थालेका छन् । यस्तो अवस्थामा स्वदेशी सवारीसाधनलाई नम्बर प्लेट नभएको आधारमा ट्राफिक प्रहरीले नियन्त्रणमा लिँदै आएको छ ।
मेड इन नेपाल, आत्मनिर्भरता, रोजगारी सिर्जना जस्ता सरकारको नारा सब भन्ने कुरा हुन जस्तो लाग्ने बताउँदै शाहले विद्युतीय दुई पांग्रे, तीन पांग्रे र चार पांग्रे सवारीसाधनको उत्पादक कम्पनी तथा एसेम्बल कम्पनीहरूका लागि सहज रूपमा सवारी दर्ताको प्रमाणपत्तर दिने गरी छुट्टै ऐन बनाउने निर्णय तत्काल गर्न ध्यानाकर्षण गराएका छन् ।
