आईसीटी समाचार
एप्पलले सोमबार वर्ल्ड वाइड डेभलपर कन्फेरेन्स (डब्लुडब्लुडीसी) २०२३ मा आफ्नो बहुप्रतीक्षित अगमेन्टेड रियालिटी (एआर) हेडसेट भिजन प्रो सार्वजनिक गर्यो । भिजन प्रो सार्वजनिक भएपनि अहिले अनेक खालका प्रतिक्रिया आइरहेका छन् ।
यसैबीच फेसबुकका संस्थापक मार्क जुकरबर्गले पनि आफ्नो प्रतिक्रिया दिएका छन् । द भर्जको रिपोर्ट अनुसार जुकरबर्गले भिजन प्रो बारे आफ्ना कर्मचारीसँग छलफल गरेका छन् । भिजन प्रो मेटाको क्वेस्टभन्दा सात गुणा बढी महँगो भएको उनको भनाइ छ ।
जुकरबर्गले भनेका छन्, ‘यो कम्प्युटिङ भविष्यको लागि राम्रो उपकरण हुन सक्छ । तर यो सोचेको जस्तो उपकरण होइन् ।’
एप्पलको भिजन प्रोमा कुनै जादुमय समाधान नभएको जुकरबर्गले बताएका छन् । उनका अनुसार एप्पल र मेटाको हेडसेटमा फरक भनेको भिजन प्रोमा हाई रिजोलुसनको डिस्प्ले प्रयोग गरिएको छ ।
'यसबाहेक एप्पलले प्रयोग गरेको ब्याट्रीले धेरै नै ऊर्जा खपत गर्ने गरेको पाउन सकिन्छ र पावर प्रणालीको मूल्य पनि हाम्रो हेडसेट भन्दा सात गुणा बढि हुन जान्छ,' जुकरबर्गले भनेका छन्, 'भिजन प्रोको उच्च ऊर्जा खपतले यसमा हरसमय प्रयोग गर्दा तार र ब्याट्री जोडिएको हुनुपर्छ । यस हेडसेटबाट हामीले पनि क्वेस्ट हेडसेटमा सुधार गर्ने धेरै पाटोहरु पाउन सक्छौँ ।'
एप्पलको भिजन प्रो आँखाको चाल र हात इशाराहरू नियन्त्रण हुन्छ । साथै यसमा पारदर्शी डिस्प्ले र हल्का डिजाइन समेत रहेको छ ।
भिजन प्रो ३५०० अमेरिकी डलरबाट सुरू हुन्छ । जबकि मेटा क्वेस्ट प्रो मेटाको सबैभन्दा महँगो हेडसेट, एक हजार डलरबाट सुरु हुन्छ । यस कारण नै जुकरबर्गले एप्पलको प्रडक्ट चाहिनेभन्दा धेरै महंगो भएको प्रतिक्रिया दिएका हुन् ।
जुकरबर्गले एप्पल भिजन प्रो उपकरणको मूल्य निर्धारणमा प्रतिक्रिया दिँदै मेटाको आगामी क्वेस्ट ३ हेडसेटको मूल्य भिजन प्रोको ३४९९ डलरको तुलनामा मात्र ४९९ डलर हुने बताएका छन् ।
क्वेस्ट थ्री कम मूल्यको कारण ठूलो संख्यामा प्रयोगकर्ताहरूले यो उपकरण प्रयोग गर्न पाउने छन् । तर पनि एप्पलको घोषणाले एआर भिआर बजारमा मेटाका लागि चुनौतीहरू थपिने देखिएको छ ।
