आईसीटी समाचार
एआई समयको साथ धेरै लोकप्रिय हुँदैछ, तर यसको खतरा पनि बढ्दै गएको छ । यसलाई ध्यानमा राखेर विभिन्न देशको सरकारले विभिन्न कदम चाल्न थालेका छन् ।
यसै क्रममा बेलायतका प्रधानमन्त्री ऋषि सुनकले बुधबार यस वर्षको अन्त्यमा आर्टिफिसियल इन्टेलिजेन्स सम्बन्धी विश्वको पहिलो शिखर सम्मेलन आयोजना गर्ने बताएका छन् ।
यसले देशहरूलाई आफ्नो क्षमताको उपयोग गरेर सम्भावित प्राविधिक विपत्तिको जोखिमलाई सीमित गर्न साझा दृष्टिकोण अगाडि बढाउन सहयोग गर्नेछ ।
बिहीबार वाशिंगटनमा अमेरिकी राष्ट्रपति जो बाइडेनसँग ह्वाइट हाउसको वार्ता अघि सुनकले एआईसँग हाम्रो जीवन सुधार्ने अविश्वसनीय क्षमता रहेको बताए । तर यसलाई सुरक्षित तरिकाले विकसित र प्रयोग गर्नु भने आवश्यक रहेको उनको भनाइ छ ।
बिहीबारको भेटमा बेलायतका प्रधानमन्त्री ऋषि सुनक र अमेरिकी राष्ट्रपति जो बाइडेनले एआई प्रविधिको विकासबारे छलफल गरेका थिए । दुबै देशका अधिकारीहरूले भनेजस्तै, नेताहरूले उनीहरूको आर्थिक सुरक्षालाई सुदृढ पार्नमा ध्यान केन्द्रित गर्दै महत्वपूर्ण र उदीयमान टेक्नोलोजीहरूमा आफ्नो दृष्टिकोणलाई समन्वय गर्ने योजना बनाएका छन् ।
बेलायतमा ८०० भन्दा बढी कर्मचारीसहितको अग्रणी अमेरिकी टेक्नोलोजी कम्पनी, प्यालेन्टिर टेक्नोलोजिजले बेलायतलाई एआई विकासको लागि नयाँ युरोपेली मुख्यालयको रूपमा स्थापना गर्ने इच्छा जताएको छ, जसमा ब्रिटिश सरकारले पनि सहमति जनाएको छ ।
