आईसीटी समाचार
काठमाडौंको बालकुमारी स्थित नेपाल कलेज अफ इन्फर्मेसन टेक्नोलोजी (एनसीआईटी) मा शनिबार विद्यार्थीका परियोजना प्रदर्शनी तथा करियर फेयर हुने भएको छ ।
प्रदर्शनी तथा करियर फेयरमा ५० बढी अन्तिम वर्षका विद्यार्थीका परियोजना र ५० बढी कम्पनी समेत सहभागी हुनेछन् । प्रदर्शनी तथा करियर फेयर निःशुल्क अवलोकन गर्न सकिने छ ।
एनसीआईटी कलेजका सफ्टवेयर इन्जिनियरिङ विभाग प्रमुख विरेन्द्र विष्टले आईटी, कम्प्युटर, सफ्टवेयर र बीसीएका अन्तिम वर्षका विद्यार्थीले तयार पारेका प्रोजेक्टहरू प्रदर्शनीमा राखिने बताए ।
‘यो कलजेको वार्षिक कार्यक्रम हो । यस वर्ष पनि शनिबार विद्यार्थीले तयार पारेका प्रोजेक्ट प्रदर्शनी गर्दै छौं,’ उनले आइसिटी समाचारसँग भने, ‘यसले विद्यार्थीलाई हौसलाका साथै प्रोजेक्टलाई अझै राम्रो बनाउन सहयोगी भूमिका खेल्ने छ ।’
प्रदर्शनीमा सूचना प्रविधिसँग सम्बन्धित विभिन्न प्रोजेक्टहरू राखिने छ । प्रदर्शनीमा राखिएका परियोजनाको मूल्यांकन समेत हुनेछ । मूल्यांकनका लागि एउटा टोली बनाइएको छ ।
मूल्यांकनका आधारमा उत्कृष्ट परियोजनालाई सम्मान समेत गरिने उनले बताए । यसका साथै विद्यार्थीको सीपलाई अभिवृद्धि हुने गरी गिफ्ट भौचर समेत दिइने छ ।
बिहान ११ बजेदेखि २ बजेसम्म सञ्चालन हुने प्रदर्शनी तथा करियर फेयर विभिन्न कम्पनीले दक्ष जनशक्तिको पहिचान समेत गर्न सक्ने छन् । कार्यक्रममा ५० भन्दा बढी कम्पनी समेत आउने छन् ।
कम्पनी र विद्यार्थीलाई एउटै थलोमा ल्याउन विभिन्न आईटी कम्पनीलाई निमन्त्रण दिएको उनको भनाइ छ । यसले शैक्षिक संस्था र उद्योगबीचको दूरीलाई कम गर्न समेत सघाउने कलेजको विश्वास छ । कम्पनीहरूले प्रदर्शनीमा आएर विद्यार्थीका परियोजना बारे बुझ्न र सम्भावित दक्ष जनशक्ति पहिचान गर्न सक्ने छन् ।
यस बाहेक शनिबार नै विश्वविद्यालय अनुदान आयोगको सहयोगमा सञ्चालित टेक्नोप्रेनरसीपका ४० स्टार्टअप आईडियाको बिजनेस प्लान समेत प्रस्तुत हुनेछ ।
