आईसीटी समाचार
काठमाडौंको बालकुमारी स्थित नेपाल कलेज अफ इन्फर्मेसन टेक्नोलोजी (एनसीआईटी) मा शनिबार विद्यार्थीका परियोजना प्रदर्शनी तथा करियर फेयर सम्पन्न भएको छ ।
प्रदर्शनी तथा करियर फेयरमा ५० बढी अन्तिम वर्षका विद्यार्थीका परियोजना र ५० बढी कम्पनी समेत सहभागी भएका थिए । प्रदर्शनी तथा करियर फेयर निःशुल्क अवलोकन गर्न सकिने व्यवस्था मिलाइएको थियो ।
एनसीआईटी कलेजका सफ्टवेयर इन्जिनियरिङ विभाग प्रमुख विरेन्द्र विष्टले आईटी, कम्प्युटर, सफ्टवेयर र बीसीएका अन्तिम वर्षका विद्यार्थीले तयार पारेका प्रोजेक्टहरू प्रदर्शनीमा राखिएको बताए ।
यो कलेजको वार्षिक कार्यक्रम हो । विद्यार्थीलाई हौसला प्रदान गर्न एनसीआईटीले प्रदर्शनी गर्दै आएको छ । यसले विद्यार्थीलाई हौसलाका साथै प्रोजेक्टलाई अझै राम्रो बनाउन सहयोगी भूमिका खेल्ने कलेजको विश्वास छ ।
कार्यक्रममा ५० भन्दा बढी कम्पनी समेत आएका थिए । कम्पनी र विद्यार्थीलाई एउटै थलोमा ल्याउन विभिन्न आईटी कम्पनीलाई निमन्त्रण गरिएको विष्टको भनाइ छ । यसले शैक्षिक संस्था र उद्योगबीचको दूरीलाई कम गर्न समेत सघाउने कलेजले जनाएको छ ।
यस बाहेक शनिबार नै विश्वविद्यालय अनुदान आयोगको सहयोगमा सञ्चालित टेक्नोप्रेनरसीपका ४० स्टार्टअप आईडियाको बिजनेस प्लान समेत प्रस्तुत गरेका थिए ।
