आईसीटी समाचार
नेपालको अग्रणी भुक्तानी प्रणाली संचालक फोनपेले ‘फोनपे गर्ने हो, बिजुलीको बिल तिर्दा आईफोन १३ जित्ने हो’ नामक योजना अन्तर्गत एक भाग्यशाली बिजेताको घोषणा गरेको छ ।
उक्त योजना गत जेष्ठ महिना भरि लागू गरिएको थियो । यस योजनाले हजारौँको संख्यामा ग्राहकहरुको सहभागिता देख्नु को साथ साथै देश व्यापीरुपमै सकारात्मक प्रतिकिया प्राप्त गरेको थियो ।
यस योजनामा आफ्नो सहभागिता जनाउन ग्राहकहरुले तोकिएको अवधिभर बिजुलीको बिल तिर्दा आफ्नो मोबाइल बैंकिङ एपमा गई फोनपे को बिल भुक्तानी सेवा प्रयोग गर्नुपर्ने सर्त लागु गरिएको थियो ।
काठमाडौँ स्थित नेपाल विद्युत प्राधिकरणको कार्यालयमा साउन ११ गते यस योजनाका भाग्यशाली विजेता अनुप सिकर्मीलाई आईफोन १३ हस्तान्तरण गरिएको थियो ।
नेपाल विद्युत प्राधिकरणका प्रबन्ध निर्देशक कुलमान घिसिङ्गले सिकर्मीलाई उक्त पुरस्कार हस्तान्तरण गरेका थिए । कुलमान घिसिंगले विजेतालाई बधाई दिदै फोनपेले नेपालमा विद्युतीय भुक्तानीलाई प्रवर्द्धन गर्न चालेका विभिन्न कदमको प्रशंसा गरेका थिए ।
‘भुक्तानीका विभिन्न विद्युतीय माध्यमहरुले नेपाललाई नयाँ युगमा प्रवेश गराएको छ । पछिल्ला दिनहरुमा यस्ता प्रविधिहरुले सबैको समय बचाउनुको साथ साथै अन्य धेरै सहुलियत प्रदान गर्दै आएको छ। म नेपाल विद्युत प्राधिकरणका सम्पूर्ण ग्राहकहरु माझ बिजुलीको शुल्क तिर्दा विद्युतीय भुक्तानीका माध्यमहरु प्रयोग गर्न आग्रह गर्दछु,’ घिसिङले भने ।
फोनपेका प्रमुख कार्यकारी अधिकृत दिवस कुमार सापकोटाले पनि आफ्नो संस्थाको लक्ष्य भनेकै सम्पूर्ण नेपाली ग्राहकहरुलाई विद्युतीय भुक्तानी प्रणालीमा प्रवेश गराई विभिन्न सुविधाहरु थप्दै जाने र पुराना भुक्तानी माध्यमका अफ्ठ्याराहरुलाई सजिलो बनाउदै लैजाने प्रतिबद्धता जनाए ।
