आईसीटी समाचार
क्युआर भुक्तानीको जानकारी आवाजबाटै दिने गरी यार्सा टेकले अडिक्युआर डिभाइस सार्वजनिक गरेको छ। यार्सा टेकले पूर्ण रूपमा कस्टमाइज गर्न सकिने गरी सुविधायुक्त अडिक्युआर नेपालमै तयार पारेको हो ।
अडिक्युआर सजिलो, सुरक्षित र भरपर्दो रहेको यार्सा टेकले जानकारी दिएको छ । अब तपाईले क्युआर स्क्यान गरेर कसैलाई पैसा तिर्दा एसएमएस कुरिरहनु पर्ने छैन् । कारोबार भएको/नभएको जानकारी आवाजबाटै अडिक्युआरले दिनेछ ।
केही महिनाको अध्ययन अनुसन्धानपछि अडिक्युआर सार्वजनिक भएको हो । अडिक्युआर एउटा डिभाइस मात्र नभएर इन्नोभेसनको प्रतिक भएको कम्पनीको भनाइ छ ।
अडिक्युआरलाई आफ्नो ब्राण्डको इमेजसँग मिल्ने गरी कस्टमाइज समेत गर्न सकिने कम्पनीले जनाएको छ । यसमा आफूलाई आवश्यक फिचर अनुसार कस्टमाइज गर्न सकिने छ । अडिक्युआरलाई डेटा, वाईफाई वा हाइब्रिड कनेक्सनबाट चलाउन सकिने छ ।
अडिक्युआर एक वर्षसम्मको रिप्लेसमेन्ट वारेन्टीसहित आउने यार्सा टेकको भनाइ छ । यस बाहेक कम्पनीले दुई वर्षसम्मको निःशुल्क मर्मत पनि उपलब्ध गराउने छ भने ५ भन्दा बढी वर्षसम्म डिभाइस सफ्टवेयरका लागि सपोर्ट प्रदान गर्नेछ ।
यसमा रहेको डिभाइस म्यानेजमेन्ट सिस्टमले अडिक्युआर डिभाइसलाई व्यवस्थापन गर्न, व्यपारीहरुलाई अनबोर्ड गर्न र सेटिंग परिवर्तन गर्नका लागि प्रयोग गर्न सकिने छ । अडिक्युआरले मिनिमम अर्डर क्वान्टीटीको आधारमा वाइफाइ बेसिक, वाइफाइ पोर्टेबल, जिएसएम पोर्टेबल, हाइब्रिड पोर्टेबल प्लानहरु सार्वजनिक गरेको छ ।
प्लान अनुसार अडिक्युआरको मूल्य फरक फरक रहेको छ । अडिक्युआरको मूल्य भ्याट बाहेक २ हजारबाट सुरू हुन्छ । यसमा २२०० एमएएचको लाइआयन ब्याट्री प्रयोग गरिएको छ, जसले १२ भन्दा बढी घण्टासम्म डिभाइसलाई पावर गर्ने र हजारौँ कारोबार सपोर्ट गर्नेछ ।
यो पनि पढ्नुहोस्ः नेपालमै विद्युतीय सामग्री उत्पादन गर्दै यार्सा टेक
