आईसीटी समाचार
एनसेलले एक विज्ञपित जारी गर्दै आफू विरुद्ध लेखिएको भ्रामक समाचारलाई खण्डित गरेको छ । एनसेलले एक राष्ट्रिय दैनिक पत्रिका र सोही पत्रिकाको अनलाइन न्युज पोर्टलमा बिहीबार (साउन २५) ‘नागरिकको गोप्य सूचना दिन एनसेल तयार’ शीर्षकमा प्रकाशित समाचारको खण्डन र घोर भर्त्सना गरेको बताएको छ । यो समाचारले नेपाली जनतालाई भ्रममा पार्न तथ्यलाई गलत ढंगले व्याख्या गरेको कम्पनीको दावी छ ।
कम्पनीको प्रतिष्ठामा आँच पुर्याउने गम्भीर प्रयास भएको र केही सीमित समूहको निहित स्वार्थ पूरा गर्न कम्पनीलाई सिकार बनाइएको एनसेलको विश्वास छ । एनसेलले विज्ञप्तिमार्फत झुटा, आधारहीन, भ्रामक र असन्तुलित समाचारबाट भ्रममा नपर्न अनुरोध समेत गरेको छ ।
कम्पनीले ग्राहकहरूका डाटा, गोपनीयता र सुरक्षालाई सदैव उच्च प्राथमिकतामा राखेको प्रतिबद्धता पनि जनाएको छ । समाचारमा भ्रामक कुरा उल्लेख भएता पनि एनसेलले ग्राहकहरूको कुनै पनि डाटामा प्रत्यक्ष वा अप्रत्यक्ष पहुँचका लागि कहिल्यै कसैलाई कानुनविपरीत अनुमति नदिएको उल्लेख गरेको छ । कम्पनीले कुनै पनि निकायलाई त्यस्ता वैयक्तिक डाटामा पहुँच प्रदान गर्न असहमत रहेको पनि ठहर गरेको छ ।
समाचारमा उल्लेख भएको कुरालाई खण्डन गर्दै एनसेलले आफ्नो सिस्टमलाई समाचारमा उल्लेख भएझैं टेलिकम्युनिकेसन ट्राफिक मोनिटरिङ एन्ड फ्रड कन्ट्रोल सिस्टम (टेरामक्स)सँग नजोडेको दावी गरेको छ ।
कम्पनीले टेरामक्सको कार्यान्वयन, इन्टिग्रेसनसँगै यसले कम्पनी र ग्राहकहरूको गोपनीयतामा पार्न सक्ने सम्भावित प्रभावबारे प्राविधिक अध्ययन गरिरहेको विज्ञप्तिमा उल्लेख छ । यो प्रविधिबारे स्पष्ट नभएसम्म एनसेलले सिस्टम इन्टिग्रेट नगर्ने र ग्राहक गोपनीयतासँग सम्बन्धित कुनै पनि डाटा कुनै पनि पक्षलाई नदिने बताएको छ ।
