आईसीटी समाचार
नेपाल दूरसञ्चार कम्पनी अर्थात नेपाल टेलिकमले दूरसञ्चार सेवा तर्फको आफ्नो आम्दानी घटेको विषयमा स्पष्टीकरण दिएको छ । गत आर्थिक वर्ष २०७९/०८० को वित्तीय विवरण सार्वजनिक गरेसँगै कम्पनीले दूरसञ्चार सेवाबापतको आम्दानी र नाफा घट्नुको कारण पेश गरेको हो ।
कम्पनीले अघिल्लो आर्थिक वर्षको तुलनामा सेवा सञ्चालनसँग प्रत्यक्ष रूपमा सम्बन्धित खर्च वृद्धि भएको र देशभित्रको अन्तरआवद्धता (ट्यारिफ) शुल्कमा भएको परिमार्जन, कम्पनीले देशभर फोरजी सेवा विस्तारसँगै डेटाको पहुँच वृद्धि भएको र सस्तो दरका डेटा प्याकेज बढ्दै गएका कारण ओटीटी सेवाको प्रयोगमा थप वृद्धि भएको कारण अन्र्तआवद्धता आयमा ६८ करोड ३७ लाख रुपैयाँले कमी भएको उल्लेख गरेको छ ।
त्यस्तै प्रतिकूल मौसमको असरले गर्दा विद्युत् आपूर्ति तथा मर्मत सम्भार कार्य समयमा हुन नसकेकाले साइटहरू समयमै सञ्चालन हुन नसक्दा र आर्थिक ऐन २०७९ मार्फत परिवर्तन गरिएको दूरसञ्चार सेवा दस्तुरका कारण समेत राजस्वमा तुलनात्मक रूपले कमी आएको टेलिकमको भनाई छ ।
यसका साथै क्षमता अभिवृद्धिका कार्यक्रम र गत वर्ष कर्मचारीको तलबमा भएको वृद्धिका कारण यस वर्ष कर्मचारीसँग सम्बन्धित निवृत्तिभरण व्यवस्थामा वृद्धि भएको छ । त्यस्तै विभिन्न निकायले पूर्वाधार निर्माण, विस्तार, मर्मत,स्थानान्तरण तथा नगरपालिका र वडा कार्यालयले गर्ने केवल व्यवस्थापनका कार्यबाट समेत कम्पनीको सेवा प्रवाह गर्ने कार्यमा प्रभाव परेकाले पनि आम्दानी घट्न पुगेको कम्पनीले उल्लेख गरेको छ ।
लागत बढी तथा प्रतिफल कम हुने विकट तथा दुर्गम स्थानमा समेत सेवा विस्तार र गुणस्तर सुधारको कार्यमा निरन्तर लागिरहेको र त्यसले गर्दा लागत समेत बढिरहेको कम्पनीले जनाएको छ ।
