आईसीटी समाचार
नेपाल अटोमोबाइल्स एशोशिएससन (नाडा) ले आयोजना गरेको नाडा अटो शो भदौ २६ गतेदेखि सुरू हुने भएको छ । ६ दिनसम्म चल्ने १५ औं संस्करणको नाडा अटो शो काठमाडौंको भृकुटिमण्डप स्थित प्रदर्शनी स्थलमा सञ्चालन हुनेछ ।
भदौ २६ गतेदेखि ३१ गतेसम्म चल्ने शोमा १२० वटा स्टलहरू रहने छन्, जसमा ४५ ब्राण्डका सवारी साधनहरू प्रदर्शनीमा राखिने छ । प्रर्दशनीमा अन्तर्राष्ट्रिय ब्राण्डका सवारी साधन, लुब्रिकेन्ट, टायर, पार्ट–पुर्जाका साथै राष्ट्रिय ब्राण्डका अटो सामग्री उत्पादक एवम् वस्तु तथा सेवा प्रदायकहरुको सहभागिता समेत रहने नाडाले जनाएको छ । यसमा काठमाडौं उपत्यका ट्राफिक प्रहरी महाशाखाको सूचना–कक्ष समेत रहने छ, जहाँबाट ट्राफिक नियम सम्बन्धी जानकारी दिइने छ ।
प्रदर्शनीमा १६ वटा ब्राण्डका चार पाङग्रे, २२ वटा ब्राण्डका दुई पाङग्रे, ७ वटा ब्राण्डका लाइट कमर्शियल भेहिकल, ९ वटा वित्तिय संस्था तथा ३० वटा लुब्रिकेन्ट, टायर, ब्याटरी, पार्ट–पुर्जा एवं ग्यारेज उपकरण कम्पनीहरुको सहभागिता रहने छ ।
प्रदर्शनीलाई बढी जानकारीमूलक, सेवामूलक र ग्राहकमुखी बनाउन अटो सम्बन्धी सेवा सुविधा दिने जस्तै वित्तीय सेवा, बिक्रीपछिका सेवा, आदिका छुट्टाछुट्टै स्टलहरु रहने छन् ।
प्रदर्शनी अवलोकन गर्न डिजिटल वालेट खल्तीबाट अग्रिम अनलाइन टिकट खरिद गर्नु पर्ने छ । खल्तीबाट टिकट काट्दा २० प्रतिशत छुट समेत पाइने छ । शो ७५ हजारले अवलोकन गर्ने आयोजकको अपेक्षा छ । अवलोकन गरेका मध्ये लक्की ड्रबाट एक जनाले व्यक्तिले एडियाको विद्युतीय स्कुटर समेत जित्नस सक्ने छन् ।
प्रदर्शनी स्थलमा सजिलै आवागमन गर्नका लागि काठमाण्डौं मल, सैनिक कल्याणकारी भवन, बस पार्क भिउ टावर लगायतका सार्वजनिक पार्किङ्ग स्थलहरूबाट महानगर यातायातको सहयोगमा शटल बस सञ्चालन गरिने नाडाले जनाएको छ ।
