आईसीटी समाचार
विश्वको पहिलो सुपरसोनिक विमान, एक्स–५९ पहिलो परीक्षण उडानको लागि तयार भएको छ । नासाले १५०० किलोमिटर प्रतिघण्टा उड्ने सुपरसोनिक विमान परीक्षणको तयारी अन्तिम चरणमा पुर्याएको हो । सुपरसोनिक कमर्शियल एयरलाइनर कन्कोर्ड अन्तिम पटक उडेको २० वर्ष पछि उड्डयन उद्योग एकदमै छिटो हवाई यात्राको युगमा प्रवेश गर्न लागेको छ ।
यसले न्यूयोर्क र लन्डन बीचको यात्रा समय लगभग तीन घण्टा ३० मिनेटमा घटाउने छ । बेलायतको नागरिक उड्डयन प्राधिकरण (सीएए) द्वारा प्रकाशित एक अनुसन्धानले सन् २०३३ सम्म लन्डनबाट सिड्नीको उडानमा दुई घण्टा मात्र लाग्ने देखाएको छ ।
यस उडानको वर्तमान अवधि लगभग २२ घण्टा छ । नासाको सुपरसोनिक विमानले सब अर्बिटसम्म उडान गर्न सक्छ । सब अर्बिटल उडान अर्बपति जेफ बेजोसको ब्लू ओरिजिन र रिचर्ड ब्रान्सनको भर्जिन ग्यालेक्टिकले प्रयोग गरेको रकेटसँग मिल्दो जुल्दो छ । सब अर्बिटको उडान लगभग ५६३२ किलोमिटर प्रति घण्टाको गतिमा सञ्चालन हुन्छन ।
उदाहरणका लागि, न्यूयोर्कदेखि सांघाईको उडानले हालको १५ घण्टाको सट्टा ३९ मिनेट मात्र लिन सक्छ । यसबाहेक न्युयोर्कदेखि लन्डनसम्मको यात्रा एक घण्टाभन्दा कम समयमै गर्न सकिन्छ ।
एक्स ५९ मा क्वाइट सुपरसोनिक टेक्नोलोजी पनि छ, जसले ध्वनि अवरोध भत्काएर सिर्जना गरिएको ध्वनि बूमलाई ध्वनि थम्पमा रूपान्तरण गर्दछ ।
नासाका अनुसार यसले विमानलाई आवाजको गति भन्दा छिटो यात्रा गर्न अनुमति दिनेछ । एक्स ५९ को आकारले अन्य सुपरसोनिक विमानहरूले उत्पादन गरेको ध्वनि बूमको सट्टा झटका तरंगहरूलाई एकसाथ आउनबाट रोक्छ। थोरै ध्वनि थम्प उत्पादन गरिन्छ ।
जब यो विमान पूर्ण रूपमा एसेम्बल हुन्छ, यो करिब ३०.५ मिटर लामो र पखेटाको चौडाइ करिब ९ मिटर हुनेछ । यसको उचाइ लगभग ४.२५ मिटर हुनेछ । यो करिब ५५ हजार फिटको उचाइमा जान सक्नेछ । तर, यसको व्यावसायिक उडान सुरु हुन केही वर्ष लाग्न सक्छ ।
ब्लु ओरिजिन जस्ता अन्तरिक्ष यात्रा कम्पनीहरूले विगत केही वर्षहरूमा रकेट निर्माण प्रविधिमा उल्लेखनीय सुधार गरेका छन्। यो प्रविधिलाई व्यावसायिक उडानमा पनि प्रयोग गर्ने सम्भावना खोजिँदैछ ।
