आईसीटी समाचार
नेपालको पहिलो तथा लोकप्रिय फुड डेलिभरी कम्पनी फूडमान्डुले ५०० रूपैयाँको न्यूनतम अर्डर रकमको नीति हटाएको छ । यसका साथै फूडमान्डुले छोटो दुरीमा हुने फुड डेलिभरी शुल्क पनि घटाएको छ ।
ग्राहकहरूको सुझावलाई मध्यनजर गर्दै फूडमान्डुले सो नीती परिवर्तन गरेको जनाएको छ । यससँगै अब ग्राहकहरूले जतिसुकै रकमको अर्डर गर्न सक्नेछन् । हालसम्म उपभोक्ताले छोटो दूरीको डेलिभरीको लागि रु. ५० को न्यूनतम डेलिभरी शुल्क तिर्नुपर्ने थियो ।
परिवर्तित नीतिअनुसार अब १.५ किलोमिटरसम्मको दुरीका लागि रु. २५ र सोभन्दा माथिको दुरीका लागि थप रु. २५ प्रति किलोमिटर तिर्नुपर्ने हुन्छ । यद्यपी रु. १००० भन्दा बढीको अर्डरको लागि भने जतिसुकै लामो दुरीमा पनि बढीमा रु. ७५ डेलिभरी शुल्क तोकिएको छ ।
नयाँ नीतिबारे बोल्दै फूडमान्डुका संस्थापक तथा प्रबन्ध निर्देशक मनोहर अधिकारीले ५०० रूपैयाँको न्यूनतम अर्डर गर्नुपर्ने बाध्यतालाई सदाको लागि हटाएको बताए ।
सन् २०१० देखि संचालनमा आएको फूडमाण्डु नेपालको पहिलो फुड डेलिभरी कम्पनी हो । फुडमाण्डले हालसम्म ४ लाखभन्दा बढी ग्राहकहरूलाई ८ सयभन्दा बढी रेष्टुरेन्टहरुमार्फत काठमाडौं उपत्यका र पोखरामा आफ्नो सेवा प्रदान गर्दै आएको छ ।
