आईसीटी समाचार
सूचना प्रविधिमा आधारित उद्योगमा अब विदेशी लगानीकर्ताले स्वचालित रूप (अटोमेटिक रूट) मा ५० करोडसम्म लगानी गर्न सक्ने भएका छन ।
उद्योग, वाणिज्य तथा आपूर्ती मन्त्रालयले राजपत्रमा सूचना प्रकाशित गर्दै नेपालमा विदेशी लगानीको माथिल्लो सीमा ५० करोड रूपैयाँ तोकेको हो ।
सूचना प्रविधिमा आधारित टेक्नोलोजी पार्क, आईटी पार्क, बायोटेक पार्क, सफ्टवेयर विकास, तथ्यांक प्रशोधन, डिजिटल म्यापिङ, बिजनेस प्रोसेस आउटसोर्सिङ, नलेज प्रोसेस आउटसोर्सिङ, डाटा सेन्टर, डाटा माइनिङ, क्लाउड कम्प्युटिङ, वेब पोर्टल र वेब डिजाइन सेवा लगायतका क्षेत्रमा लगानी गर्न सकिने छ ।
तर सूचना प्रविधिमा आधारित उद्योगमा स्वचालित मार्गबाट विदेशी लगानीको स्वीकृति गर्दा लगानीको न्यूनतम सीमा लागु नहुने व्यवस्था समेत गरेको छ ।
सूचना प्रविधिमा आधारित उद्योगसहित उर्जामूलक उद्योग, कृषि तथा वन पैदावारमा आधारित उद्योग, पूर्वाधार उद्योग, पर्यटन उद्योग, सेवामूलक उद्योग र उत्पादनमूलक उद्योग विदेशी लगानीकर्ताले सिधैं ५० करोडसम्म लगानी गर्न सक्ने व्यवस्था गरिएको छ ।
सरकारले विदेशी लगानी तथा प्रविधि हस्तान्तरण ऐन २०७५ अनुसार राजपत्रमा नयाँ सीमा र उद्योगका क्षेत्र तोकेको हो ।
