आईसीटी समाचार
नेपाल टेलिकमलाई पछिपार्दे एनसेलले फोरजी सेवाको लागि प्रयोग हुने १८ सय ब्याण्ड मेगाहर्जको फ्रिक्वेन्सी हात पारेको छ ।
पुस २ गते सोल्टी क्राउन प्लाजामा नेपालमै पहिलो पटक भएको फ्रिक्वेन्सी बोलकबोलको अन्तिम अर्थात तेस्रो राउण्डमा प्रति मेगाहर्ज फ्रिक्वेन्सीको लागि नेपाल टेलिकमले ५ करोड १ हजार प्रस्ताव गर्दा एनसेलले ५ करोड ८० लाख प्रस्ताव गरेको थियो । ५ करोड ८० लाख प्रस्ताव गरेको एनसेलले टेलिकमलाई पछाडि पार्दै फ्रिक्वेन्सी हात पारेको हो ।
यस फ्रिक्वेन्सी बोलकबोलमा एनसेल र नेपाल टेलिकम सहभागी भएका थिए । एनसेललाई भने लाभकर नतिर्दै फ्रिक्वेन्सी बोलकबोलमा सहभागी गराइएको थियो ।
अक्सनको पहिलो राउण्डमा प्रति मेगाहर्ज फ्रिक्वेन्सीको लागि नेपाल टेलिकमले ३ करोड ७८ लाख बोलकबोल गर्दा एनसेलले ३ करोड ९६ लाख कबोल गरेको थियो ।
पहिलो राउण्डमा अग्रता लिएको एनसेलले दोस्रो राउण्डमा पनि अग्रता लिएको थियो । जसमा अक्सनको दोस्रो राउण्डमा प्रति मेगाहर्जको लागि नेपाल टेलिकमले ४ करोड २० लाख प्रस्ताव गर्दा एनसेलले ४ करोड ३२ लाख रुपैया कबोल गरेको थियो ।
फ्रिक्वेन्सी बोलकबोलको हरेक चरणमा कबोल गरिएको उच्च बोलकबोल मूल्यमा पाँच प्रतिशत थप गरी अर्को चरणको आधारभूत मूल्य तय गरिएको थियो ।
गएको मंसिर २६ गते चौधरी ग्रुप अन्तर्गतको सीजी कम्युनिकेशनले अदालतको अन्तरिम आदेश बाट फ्रिक्वेन्सी बोलकबोल रोक्न अदालतमा मुद्दा दायर गरेको थियो ।
सीजी कम्युनिकेशनले दायर गरेको मुद्दामा सर्वोच्च अदालतले अन्तरिम आदेश जारी नगरेपछि फ्रिक्वेन्सी बोलकबोल प्रकृया सुरु भएको हो ।
