आईसीटी समाचार
केही दिन अघि बिमा समितिले औपचारिक सुरुवात गरेको कोरोना भाइरस बिमा लेख आइएमई पेबाटै खरिद गर्न सकिने भएको छ ।
आइएमई पेबाट कोरोना भाइरस सम्बन्धि बिमा लेख खरिद गर्न आइएमई पेमा गई कोरोना भाइरस बिमा योजना ब्यानरमा ट्याप गर्नुपर्ने छ ।
त्यसपछि आफुले बिमा गर्न चाहेको कम्पनी छनौट गरी आइएमई पेबाट भुक्तानी गरि बिमा लेख खरिद गर्न सकिनेछ ।
कोरोना भाइरसबाट उत्पन्न हुनसक्ने जोखिमको आर्थिक सुरक्षण प्रदान गर्न तथा बिशेष गरी ग्रामीण स्तरसम्म न्युन आय भएका वर्गलाई समावेश गर्ने उदेश्यले कोरोना भाइरस सम्बन्धि बिमा लेखको सुरुवात भएको हो ।
बिमा पोलिसी खरिद गरेको १५ दिनपछि एकवर्ष सम्म पीसीआर प्रविधिबाट कोरोना भाइरस संक्रमण भएको प्रमाणित भएमा बिमा दाबी गर्न सकिने छ । कोरोना भाइरस सम्बन्धि बिमा लेखलाई दुई श्रेणीमा बिमाङ्क गरिएको छ ।
पहिलो बिमालेख १ लाख रुपैयाँको बिमाङ्कको छ भने दोस्रो बिमालेख ५० हजार रुपैयाँको रहेको छ । १ लाख रुपैयाँको बिमा लेख खरिद गर्न प्रतिव्यक्ति एकहजार रुपैयाँ लाग्ने छ भने परिवार वा संस्थागत रुपमा बिमा गरिएमा प्रतिव्यक्ति ६ सय रुपैयाँ लाग्ने छ ।
त्यस्तै ५० हजार रुपैयाँको बिमा लेख खरिद गर्न प्रतिव्यक्ति ५ सय रुपैया लाग्ने छ भने परिवार वा संस्थागत रुपमा बिमा गरिएमा प्रतिव्यक्ति ३ सय रुपैयाँ लाग्ने छ ।
नेपालमा सञ्चालनमा रहेका २० वटै निर्जीवन बिमा कम्पनीबाट बिमा योजना खरिद गर्न सकिने छ ।
