आईसीटी समाचार
रोबोटिक्स एशोशिएसन नेपाल (र्यान) ले बनाएको ‘सिस्टर रोबोट’ शुक्रराज ट्रपिकल तथा सरुवा रोग अस्पताल टेकुलाई हस्तान्तरण गरिएको छ । कोरोना रोकथाममा सहयोग पुर्याउने उदेश्यले शुक्रबार सिस्टर रोबोटलाई हस्तान्तरण गरिएको हो ।
ट्रान्समिटरको सहयोगले यस रोबोटलाई एकसय मिटरदेखि पाँचसय मिटर सम्म सञ्चालन गर्न सकिने छ । रोबोटमा क्यामेरा समेत जडान गरिएको छ । जसले गर्दा कोरोना भाइरस संक्रमित बिरामीलाई निगरानीको लागि सहज हुनेछ ।
संयुक्त राष्ट्रसङ्घ विकास कार्यक्रम (युएनडीपी) नेपाल र सगरमाथा इन्जिनियरिङ कलेजको आर्थिक सहयोगमा यो रोबोटको विकास भएको हो ।
रोबोटको सहयोगले बिरामिलाई औषधि तथा खाना पुर्याउन सकिने छ । रोबोटमा जडित यन्त्रको माध्यमबाट बिरामीले आफ्नो हातलाई स्यानिटाइजरले सफा गर्न सक्ने छन् । साथै रोबोटको सहायताले स्वास्थ्यकर्मीसँग पनि कुराकानी गर्न सकिने छ ।
