सस्तो मूल्यमा सामान पाइने भन्दै गरिएको फेक विज्ञापनको प्रलोभनमा नपर्न प्रहरीको अनुरोध

फेसबुक पेजमा मोबाइल, घडी तथा अन्य महङ्गो मूल्यका सामानहरु सस्तो मूल्यमा बिक्रीमा छ भन्दै ठगी गर्ने गिरोह सक्रिय रहेको र यस्ता विज्ञापनको प्रलोभनमा नपर्न महानगरीय अपराध महाशाखाले अनुरोध गरेको छ ।

महानगरीय अपराध महाशाखाले एक सूचना जारी गर्दै सर्वसाधारणलाई सस्तो मूल्यमा सामान पाइने भन्दै फेसबुक लगायतका पेजमा प्रकाशित फेक विज्ञापनको प्रलोभनमा नपर्न अनुरोध गरेको हो ।

महाशाखाको सूचनामा भनिएको छ, ‘फेसबुक पेजमा आइफोन, वानप्लस र अन्य ब्राण्डका मोबाइल घडी तथा अन्य महँगा सामानहरू अत्यन्त सस्तो मूल्यमा विक्रीमा छ, स्टक लिमिटेड छ भनि विज्ञापन गरी ग्राहकहरूलाई विभिन्न बैंकका खाताहरू उपलब्ध गराउने तथा आइएमई गर्न भन्ने र खातमा पैसा जम्मा भएपश्चात अर्डर गरेको सामान डेलिभरी नगरी ठगी गर्ने गिरोह सक्रिय छ ।

यस्ता घटनाको उजुरी परेपछि अनुसन्धानको काम भइरहेको पनि महानगरीय अपराध महाशाखाले जनाएको छ ।