११५५ टोल फ्रि नम्बरमा फोन गरेर बाढीको जानकारी लिन सकिने

नेपालमा मनसुन सक्रिय भएसँगै देशका विभिन्न ठाउँमा बाढी तथा पहिरोको जोखिम बढेको छ । यसैलाई मध्यनजर गर्दै सरकारले बाढीको जानकारी दिन असार १ गतेदेखि टोल फ्रि नम्बरको व्यवस्था गरेको छ ।

सरकारले टोल फ्रि नम्बरको व्यवस्था गरेसँगै अब सर्वसाधारणले ११५५ मा निशूल्क फोन गरेर नदीमा पानीको सतह र बहाबबारे जानकारी लिन सक्ने छन् । यो सेवा चौबीसै घण्टा उपलब्ध हुनेछ ।

त्यस्तै मौसम पूर्वानुमान महाशाखाले पनि हाल बाढी, पहिरो र डुबान बारे पूर्वसूचना दिन सुरु गरेको छ । हरेक दिन बिहान सात बजे प्रमुख नदीहरूको आगामी तीन दिनको बाढी प्रक्षेपण बुलेटिन विभागको वेबसाइट hydrology.gov.np मार्फत जारी गरिनेछ ।

त्यसैगरी नेपाल बाढी सूचना – नेपाल फ्लड अलर्ट नामक फेसबुक पेज तथा ट्विटर अकाउन्ट मार्फत बाढीका साथै बाढीजन्य अन्य सूचना समेत पाउन सकिने छ ।

बाढी तथा डुबानको क्षतिको लेखाजोखा गर्न ड्रोनको प्रयोग गर्ने सरकारको तयारी रहेको छ भने बाढीले प्रभावित गर्ने क्षेत्रका सर्वसाधारणलाई मोबाइलमा म्यासेज पठाउने व्यवस्था समेत गरिएको छ ।