आईसीटी समाचार
राष्ट्रिय सूचना प्रविधि आकस्मिक सहायता समूह (नेशनल सर्ट) ले माइक्रोसफ्ट विन्डोज सर्भरलाई अपडेट गर्न सुझाब दिएको छ । राष्ट्रिय सूचना प्रविधि आकस्मिक सहायता समूहले असार ३१ गते एक सूचना प्रकाशित गरी सरकारी निकायहरुलाई माइक्रोसफ्ट विन्डोज सर्भर तत्काल अपडेट गर्न सुझाब दिएको हो ।
माइक्रोसफ्ट लगायत साइबर सुरक्षा संस्थाहरुद्वारा प्रकाशित एडभाइजरीबाट विन्डोज २००३ देखि विन्डोज २०१९ सम्मको डिएनएस सर्भरमा SigRed नामक जोखिम देखिएको उक्त सूचनामा उल्लेख गरिएको छ ।
यसलाई समाधान गर्नको लागि माइक्रोसफ्टले उपलब्ध गराएको प्याच अपडेट गरी सर्भरलाई सुरक्षित राख्न भनिएको छ । यही जुलाई १४ मा विन्डोज सर्भरमा ‘वर्मबेल’ नामक भल्नेराबिलिटी पत्ता लागेको थियो । यसले विन्डोज सर्भरलाई असर गरेको र नन विन्डोज सर्भरलाई भने असर नगरेको जानकारी दिइएको छ ।
