आईसीटी समाचार
नेपाल विज्ञान तथा प्रविधि प्रज्ञा प्रतिष्ठान (नास्ट) ले मोबाइल स्वाब क्लेक्सन भेहिकलको विकास गरेको छ । नास्टले कोरोना भाइरस संक्रमितबाट चिकित्सकलाई सुरक्षित राख्नको लागि यो भेहिकल बनाएको हो ।
मोबाइल स्वाब क्लेक्सन भेहिकलमा ग्लोब्स, पोजेटिभ प्रेसर च्याम्बर, आइस बक्स तथा भाइरस फिल्टर गर्ने प्रविधि लगायत आवश्यक चिज राखिएको छ ।
यो भेहिकलबाट संकलन भएको स्वाब त्यसभित्र रहेको आइस बक्समा राखिने छ । अनि बक्समा राखिएको स्वाब प्रयोगशालामा परीक्षणको लागि पठाइने छ ।
यस भेहिकलको प्रयोग गरी पहिलो चरणमा सिंहदरबार भित्र आज स्वाब संकलन गरिएको छ । नेपाली सेनाले उपलब्ध गराएको गाडीमा आवश्यक बस्तु जडान गरी स्वाब संकलन भेहिकलको विकास गरिएको हो ।
यसबाट स्वाब संकलन गर्दा पीपीई पनि आवश्यक नपर्ने बताइएको छ । यो भेहिकललाई चिकित्सकको खुट्टाले स्वीच अन गरेपछि ग्लोब्स र चालकको हातले स्वीच अन गरेपछि पुरै भेहिकल संक्रमणमुक्त गर्न सकिने गरी विकास गरिएको छ । भेहिकल नास्टका उपकुलपति सुनिलबाबु श्रेष्ठले सीसीएमसीलाई हस्तान्तरण गरेका हुन् ।
