केही दिनमा एसईईको नतिजा सार्वजनिक हुदै, यसरी हेर्नुहोस् नतिजा 

राष्ट्रिय परीक्षा बोर्डले अबको केही दिन भित्रै माध्यमिक शिक्षा परीक्षा (एसईई) को नतिजा सार्वजनिक गर्ने तयारी गरिरहेको छ । एसईइको नतिजा प्रकाशनको तयारी अन्तिम चरणमा पुगिसकेको बोर्डले जनाएको छ ।

कोभिड १९ को कारणले गर्दा भौतिक रुपमा जाँच लिन नमिलेपछि विद्यालयको आन्तरिक मूल्यांकनको आधारमा बोर्डले नतिजा प्रकाशन गर्दै छ ।

आज हामी तपाईलाई नतिजा सार्वजनिक भएपछि कसरी एसईईको नतिजा हेर्ने भनेर केही जानकारी दिदैछौं ।

विद्यार्थीहरुले राष्ट्रिय परीक्षा बोर्डको वेबसाइट , बोर्डको परीक्षा नियन्त्रण कार्यालयको कक्षा १० को वेबसाइट , नेपाल टेलिकम तथा एनसेलको वेबसाइट , इडियु सञ्जाल र कान्तिपुर पब्लिकेशनको वेबसाइट बाट एसईईको नतिजा हेर्न सक्नेछन् ।

त्यस्तै नेपाल टेलिकमका प्रयोगकर्ताले १६०० मा डायल गरेर पनि नतिजा हेर्न सकिने छ । भने एनसेल र नेपाल टेलिकमका प्रयोगकर्ताले आफ्नो एसईईको सिम्बोल नम्बर टाइप गरी १६०० मा एसएमएस पठाएर पनि नतिजा हेर्न सक्ने राष्ट्रिय परीक्षा बोर्डले जानकारी दिएको छ ।

यस्तै ईजी सर्भिसेज प्रालिको ३४९४९ मा एसएमएस पठाएर पनि एसईईको नतिजा हेर्न सकिने बोर्डले जनाएको छ ।