आईसीटी समाचार
अब हराएको वा चोरी भएको सवारी साधनको विवेदन अनलाईनबाटै दिन सकिने भएको छ । ट्राफिक महाशाखाबाट दिने सेवालाई थप प्रविधिमैत्री बनाउदै सेवाग्राहीलाई थप सहज र सरल बनाउन प्रहरी प्रधान कार्यालयको सहयोगमा हराएको वा चोरी भएको सवारी साधनको विवेदन अनलाईनबाटै दिने व्यवस्थाको शुरुवात गरेको हो ।
महाशाखाका प्रमुख एसएसपी भिम प्रसाद ढकालले हराएको वा चोरी भएको वा फेला परेको सवारी साधनको अभिलेख व्यवस्थापनको लागि लस्ट एण्ड फाउन्ड भेहिकल म्यानेजमेन्ट सिस्टम सफ्टवेयर सञ्चालनमा ल्याएको बताए ।
अनलाईन सेवा सुरु भएसँगै निवेदन र सिफारिसको लागि ट्राफिक कार्यालय धाउनुपर्ने दिनको अन्त्य भएको छ र सेवाग्राहीले घरैबाट निवेदन दिन सकिने र सवारी साधन फेला परेको जानकारी लिन सकिने उनले बताए ।
यसको लागि सवारी धनीले अब यहाँ क्लिक गरी फर्म भर्नुपर्ने हुन्छ । त्यसपछि सेवाग्राहीले हराएको सवारी साधनको विवरण, सवारी धनीको विवरण, हराएको स्थानको विवरण, निवेदकको विवरण लगायतको जानकारी दिनुपर्ने हुन्छ ।
माग भएअनुसार सबै विवरण भरिसकेपछि सेभ अप्सनमा क्लिक गर्नुहोस । यति गरेपछि निवेदकले एप्लिकेसन नम्बर प्राप्त गर्न सक्नेछन् । सेवाग्राहीले अनलाइनबाटै सवारी साधन फेला परे नपरेको थाहा यहाँ क्लिक गरी दिएको एप्लिकेसन नम्बर, पुरा नामथर र सवारी नम्बर राखेर चेक गर्नु पर्नेछ ।
यस अघि लाईसेन्स, बिल बुक र पर्मिट हराएको निबेदन र सिफारिस लिन ट्राफिक महाशाखा धाउनुपर्ने बाध्यताको समेत अन्त्य गरेको थियो । असोज ५ गतेदेखि शुरु भएको अनलाइन सेवाबाट ९४९ जना सेवाग्राहीले अनलाईबाटै सेवा प्राप्त गरेका छन ।
