आईसीटी समाचार
नेपाल दूरसञ्चार प्राधिकरणले इन्टरनेट सेवा प्रदायकहरुलाई दिएको निर्देशन अनुसार हालसम्म ४ जना सेवा प्रदायकले मात्रै टोल फ्री नम्बर राखेका छन् ।
प्राधिकरणले गत असारमा ग्राहकको गुनासो सुन्न इन्टरनेट सेवा प्रदायकलाई अनिवार्य टोल फ्री नम्बर राख्न निर्देशन दिएको थियो ।
दूरसञ्चार प्राधिकरणका अनुसार हालसम्म नेपाल दूरसञ्चार कम्पनी लिमिटेड (नेपाल टेलिकम), वर्ल्ड लिंक कम्युनिकेशन्स, सुबिसु केबलनेट प्रालि र ब्रोडब्याण्ड नेपाल प्रालिले टोल फ्री नम्बर राखेका छन् ।
जस अनुसार नेपाल टेलिकमले १४९८ र १९८ टोल फ्री नम्बर उपलब्ध गराएको छ । त्यस्तै वर्ल्ड लिंक कम्युनिकेशन्सले १६६००१-५५०५०, सुबिसु केबलनेटले १६६००१-५९९९९ र ब्रोडब्याण्ड नेपालले १६६०७१-५२००४ टोल फ्रि नम्बरको व्यवस्था गरेका छन् ।
यता टोल फ्रि नम्बर नराख्ने इन्टरनेट सेवा प्रदायकलाई नेपाल दूरसञ्चार प्राधिकरणले कारबाही गर्ने तयारी गरेको छ ।
