आईसीटी समाचार
सामसङले आफ्नो ग्यालेक्सी ग्याजेटका प्रयोगकर्ताहरुलाई सजिलै गियर खोज्न मिल्ने ‘स्मार्ट थिङस फाइण्ड’ एप सार्वजनिक गरेको छ ।
यो सामसङको ‘फाइण्ड माई मोबाइल’ एपकै परिमार्जित फिचर हो । यो एपले पनि सामसङको स्मार्टफोन मात्रै नभएर ग्यालेक्सी ट्याबलेट, स्मार्टघडी र ईयरबडलाई पनि खोजिदिने गर्दछ ।
स्मार्ट थिङ्गस फाइण्ड फिचरलाई गत महिना अमेरिका, बेलायत र दक्षिण कोरियामा सार्वजनिक गरिएको थियो । तर अब भने सामसङ यो फिचरलाई विश्वव्यापी रुपमा सार्वजनिक गरेको छ ।
यो फिचरले ग्याजेटहरु भेटाउन ब्लुटूथ लो इनर्जी र अल्ट्रा वाइडब्याण्ड प्रविधिको प्रयोग गर्ने गर्दछ । यसको लागी रजिस्टर गरेपछि मोबाइल नेटवर्कसँग नजोडिकन पनि यो फिचर प्रयोग गर्न सकिन्छ ।
यसले प्रयोगकर्ताहरुलाई म्यापमा डिभाइस कहाँ छ भनेर देखाउने गर्दछ । यो फिचरको लागी भने डिभाइस एन्ड्रोइड ८ या त्यो भन्दा माथिको हुनुपर्दछ । त्यस्तै टिजेन ५.५ वा त्यसपछिका ग्यालेक्सी वाचमा समेत यो सुविधा प्रयोग गर्न सकिने छ ।
यो एपले प्रयोगकर्ताहरुलाई उनीहरुको डिभाइसको लोकेसन म्यापमा देखाउने छ । एकपटक प्रयोगकर्ता नजिक पुगेपछि डिभाइस लोकेट गर्न रिङ् बजाउन सक्छन ।
