आईसीटी समाचार
यही मंसिर १० गते नेपाल विज्ञान तथा प्रविधि प्रज्ञा प्रतिष्ठान (नास्ट) का पूर्व उपकुलपति तथा भौतिकशास्त्री प्रा.डा. केदारलाल श्रेष्ठको ८२ वर्षको उमेरमा निधन भयो ।
उनी सन् १९९२ देखि १९९७ सम्म तत्कालिन शाही नेपाल विज्ञान तथा प्रविधि प्रज्ञा प्रतिष्ठान (रोनास्ट) मा पूर्व उपकुलपति भएर काम गरेका थिए ।
सन् १९३८ मा जन्मिएका श्रेष्ठले त्रिचन्द्र क्याम्पसबाट आइएससी र बीएससी गरेका थिए । उनी अष्ट्रेलियाको क्वीन्सल्याण्ड विश्व विद्यालयबाट भौतिकशास्त्र विषयमा पिएचडी गर्ने पहिलो नेपाली नागरिक पनि हुन् ।
उनी सन् १९७९ देखि १९८६ त्रिभुवन विश्वविद्यालयले स्थापना गरेको सेन्टर फर एप्लाइड साइन्स एण्ड टेक्नोलोजी (रिकाष्ट) मा कार्यकारी निर्देशकको रुपमा समेत काम गरेका हुन् ।
विज्ञान तथा प्रविधि मन्त्रालयको सल्लाहकार हुँदा बनेपामा ‘आइटी पार्क’ निर्माण र आइटी ऐन बनाउन पनि उनको सहयोग रहेको छ । उनी ललितपुर महानगरपालिकाका सल्लाहकार समेत रहेका थिए ।
श्रेष्ठ सन् १९७४ देखि १९७६ सम्म त्रिभुवन विश्वविद्यालय केन्द्रिय भौतिकशास्त्र विभागको प्रमुख समेत थिए । भौतिकशास्त्र विभागमा उनले लामो समयसम्म प्राध्यापन गरेका थिए ।
उनले नेपाल भौतिक विज्ञान समाजका अध्यक्ष, इनस्टिच्युट अफ साइन्स एण्ड टेक्नोलोजीका सहायक डीन,राष्ट्रिय वातावरण संरक्षण परिषदको सदस्य, राष्ट्रिय विज्ञान तथा प्रविधि परिषदको सदस्य सचिव लगायत अन्य महत्वपूर्ण जिम्मेवारीमा रहेर काम गरेका थिए ।
उनी सन् १९९२ देखि १९९८ सम्म कम्प्युटर सिस्टम तथा इन्टिग्रेटेड टेक्नोलोजीको प्रबन्ध निर्देशक भएरसमेत काम गरेका थिए ।
करोडौ रुपैयाँ खर्चेर मेचीदेखि महाकाली सम्म विभिन्न स्तरका कम्प्युटर तालिमको रुपरेखा कोर्न पनि उनले नेतृत्व गरेका थिए । केदारलाल प्रविधि सबैको पहुँचमा हुनुपर्छ भन्थे ।
कम्प्युटर एशोशिएसन नेपाल (क्यान महासंघ) निर्माण गर्न पनि उनको सहयोग उतुलनिय रहेको छ । श्रेष्ठ नेपालको विज्ञान तथा प्रविधि क्षेत्रमा उनको उल्लेख्य योगदान पुर्याउने व्यक्ति मध्य एक हुन् ।
श्रेष्ठका श्रीमती, दुई छोरा र दुई छोरी छन् । उनको निधनले राष्ट्रलाई नै क्षति पुगेको छ । नेपालको विज्ञान तथा प्रविधि क्षेत्रमा उनले २० वर्ष भन्दा बढी समय योगदान दिएका छन् ।
